అవినీతి సొమ్ముతో జగన్ టీవీ చానెల్, పత్రిక పెట్టారు: బాబు

అనంతపురం: దివంగత నేత వైయస్ రాజశేఖర రెడ్డి ప్రభుత్వ హయాంలోని అవినీతి సొమ్ముతో టీవీ చానెల్, పత్రిక పెట్టారని తెలుగుదేశం పార్టీ అధ్యక్షుడు నారా చంద్రబాబు నాయుడు కాంగ్రెసు కడప పార్లమెంటు సభ్యుడు వైయస్ జగన్ పై ధ్వజమెత్తారు. వైయస్ పాలనలో అవినీతి సొమ్మును పెద్ద యెత్తున దండుకున్నారని ఆయన మంగళవారం మీడియా ప్రతినిధుల సమావేశంలో ఆరోపించారు. ఎమ్మార్ ప్రాపర్టీస్ లో కోట్లాది రూపాయల అవినీతి చోటు చేసుకుందని ఆయన అన్నారు. వైయస్సార్ గాంధీ, అంబేడ్కర్, ఎన్టీఆర్ ల కన్నా గొప్పవాడా, వారి విగ్రహాల కన్నా పెద్దగా వైయస్సార్ విగ్రహాలు ఏర్పాటు చేస్తారా అని ఆయన అడిగారు.

మున్సిపల్ ఎన్నికలను కావాలనే ప్రభుత్వం ఆలస్యంగా జరుపుతోందని, ప్రత్యేకాధికారుల పాలనలో మున్సిపాలిటీలు మరింతగా దిగజారుతాయని ఆయన అన్నారు. కడప మేయర్ రవీంద్రనాథ్ రెడ్డిపై 420 కేసును ఉపసంహరించుకోవడం ముఖ్యమంత్రి కె. రోశయ్య పిరికిపంద చర్య అని ఆయన వ్యాఖ్యానించారు. వచ్చే నెల 2వ తేదీ నుంచి మద్యం విచ్చలవిడి అమ్మకాల నియంత్రణ కోసం ఉద్యమం చేస్తామని ఆయన చెప్పారు. తమ పార్టీ వారు వ్యాపారాలు చేసుకోకుడదా అని ఆయన అడిగారు. తమ పార్టీవారు మద్యం విచ్చలవిడిగా అమ్మితే వారిపైనా తమ పోరాటం ఉంటుందని ఆయన చెప్పారు. తెలంగాణ, సమైక్యాంధ్రలపై తమకు స్పష్టమైన వైఖరి ఉందని, సమైక్యాంధ్రపై తన వైఖరిని ఇప్పటికే స్పష్టం చేశానని ఆయన అన్నారు.