చిరంజీవిపై ప్రజారాజ్యం నేత భూమా నాగిరెడ్డి అసంతృప్తి

కర్నూలు: తమ పార్టీ అధ్యక్షుడు చిరంజీవిపై ప్రజారాజ్యం కర్నూలు జిల్లా కన్వీనర్, మాజీ పార్లమెంటు సభ్యుడు భూమా నాగిరెడ్డి తీవ్ర అసంతృప్తి వ్యక్తం చేశారు. భూమా నాగిరెడ్డి సతీమణి శోభానాగిరెడ్డి ప్రజారాజ్యం శాసనసభ్యురాలిగా ఉన్నారు. ప్రజారాజ్యం పార్టీ ఏం చేస్తోందో, తాము ఏం చేయాలో అర్థం కావడం లేదని, ఎవరితో పోరాడాలో కూడా అంతుపట్టడం లేదని భూమా నాగిరెడ్డి అన్నారు. వాస్తవం మాట్లాడుతున్నానని, రాజకీయం సక్రమంగా ఉంటే అన్నీ సక్రమంగా ఉంటాయని ఆయన అన్నారు. నంద్యాలలో బుధవారం పీఆర్పీ కౌన్సిలర్ల సన్మాన కార్యక్రమంలో ఆయన తన అసహనాన్ని, అసంతృప్తిని వ్యక్తం చేశారు.

రాష్ట్రంలో అన్నిపార్టీలు అయోమయంలో ఉన్నాయన్నారు. ఒకప్పుడు వ్యక్తులను చూసి రాజకీయాలు నడిచేవని, నేడు డబ్బును చూసి నడుస్తున్నాయని చెప్పారు. తెలంగాణపై తెలుగుదేశం, తెలంగాణ రాష్ట్ర సమితి (తెరాస) నేతలు పరస్పరం విమర్శించుకోవడానికే సమయం సరిపోతోందని చెప్పారు. కాంగ్రెస్ నేతలేమో జగన్ జపానికే ఎక్కువ సమయం కేటాయిస్తున్నారన్నారు. మంత్రి శిల్పా మోహన్ రెడ్డిపై ఆయన తీవ్రంగా ధ్వజమెత్తారు.