జగన్ ఓదార్పు: వెనక్కు తగ్గని నెల్లూరు డిసిసి అధ్యక్షుడు గోపాల్ రెడ్డి

నెల్లూరు: పొట్టి శ్రీరాములు నెల్లూరు జిల్లా డిసిసి అధ్యక్షుడు అధిష్టానం సీరియస్ పై ఏ మాత్రం తగ్గడం లేదు. గురువారం ఆయన విలేకరులతో మాట్లాడారు. కాంగ్రెసు మంచి కోరే వ్యక్తుల్లో నేనూ ఒకడినని, పార్టీకి మంచి భవిష్యత్తు ఉండాలనే నేను కోరుకుంటున్నానని అందుకే జగన్ కు మద్దతు తెలుపుతున్ననన్నారు. కొన్నేళ్లుగా వైఎస్ రాజశేఖర్ రెడ్డికి అనుచరుడిగా ఉంటున్నానని, ఆయన చేసిన మంచి పనులను ప్రజలు ఎప్పుడూ గుర్తు చేసుకుంటున్నారన్నారు. అందువల్లనే జగన్ కు భారీ స్పందన వస్తుందని, ఆయనకు ప్రజలు బ్రహ్మరథం పడుతున్నారన్నారు. దీనిని అధిష్టానం అర్థం చేసుకోవాలన్నారు.

తనకు ఇప్పటి వరకు షోకాజ్ నోటీసు రాలేదని, కాని అధిష్టానం అడిగిన వాటికి సమాధానం చెప్పానని ఆయన అన్నారు. అధిష్టానం విరుద్దంగా ఓదార్పులో పాల్గొంటారా అని కొందరు అడిగిన ప్రశ్నకు ఆయన ఏమాత్రం తడుముకోకుండా పాల్గొంటానన్నారు. జగన్ ఓదర్పు యాత్ర నెల్లూరులో సాగినప్పుడు తాను తప్పకుండా పాల్గొంటానని, పార్టీని బలోపేతం చేస్తానని అన్నారు.