వైయస్ జగన్ ఓదార్పు యాత్రను నిషేధించండి: అంబటి రాంబాబు

హైదరాబాద్: ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ పై పార్టీ బహిష్కృత నేత అంబటి రాంబాబు తీవ్రంగా ధ్వజమెత్తారు. డి. శ్రీనివాస్ పేరెత్తకుండా ఆయన పిసిసి నాయకత్వం అంటూ విమర్సల జడివాన కురిపించారు. కడప పార్లమెంటు సభ్యుడు వైయస్ జగన్ ఓదార్పు యాత్రలో పాల్గొనడమే తప్పయితే ఆ యాత్రను నిషేధించాలని ఆయన పిసిసి నాయకత్వానికి సవాల్ విసిరారు. జగన్ ఓదార్పు యాత్రలో పాల్గొన్నందుకే పిసిసి నాయకత్వం నాయుకలపై చర్యలు తీసుకుంటోందని, అది తప్పయితే ఓదార్పు యాత్రను నిషేధించాలని ఆయన అన్నారు. ఓదార్పు యాత్రను వ్యక్తిగత కార్యక్రమంగా అధిష్టానం చెప్పిందని, అటువంటి సందర్భంలో వ్యక్తిగతంగా ఆ కార్యక్రమంలో పాల్గొంటే తప్పు ఎలా అవుతుందని ఆయన అన్నారు. ఓదార్పు యాత్ర విషయంలో తప్పుడు అభిప్రాయాలకు తావిస్తోందని ఆయన విమర్సించారు.

పార్టీ నాయకులను సస్పెండ్ చేస్తూ పోతే పార్టీలో ఎవరూ మిగలరని ఆయన అన్నారు. పిసిసి గాంధీ భవన్ కార్యాలయం తప్పిదాల నిలయంగా గబ్బిలాల ఆవాసంగా మారే ప్రమాదం ఉందని ఆయన అన్నారు. పార్టీ విజయంలో ప్రస్తుతం సస్పెండ్ అయిన నాయకుల పాత్ర కూడా ఉందని ఆయన చెప్పారు. తెలుగుదేశం పార్టీకి వణుకు పుట్టిస్తున్న ఓదార్పు యాత్రను అడ్డుకోవడం సరి కాదని, అలా అడ్డుకుంటే తెలుగుదేశం పార్టీకి లాభం చేకూరుతుందని, అలా లాభం చేకూర్చడమే పిసిసి నాయకత్వం అభిమతమా అని ఆయన అన్నారు.

పార్టీకి వ్యతిరేకంగా మాట్లాడిన మధు యాష్కీ, వి హనుమంతరావులపై ఫిర్యాదు చేసినా చర్యలు తీసుకోలేదని, ఓదార్పు యాత్రలో పాల్గొన్నవారిపైనే చర్యలు తీసుకుంటున్నారని ఆయన అన్నారు. పరిస్థితి చూస్తుంటే వైయస్ జగన్ వ్యతిరేకులు తెలుగుదేశం పార్టీతో మ్యాచ్ ఫిక్సింగ్ కు దిగినట్లు అనుమానం కలుగుతోందని ఆయన అన్నారు. తాను జగన్ అభిప్రాయాలను వెల్లడించడం లేదని, ఓ సీనియర్ కాంగ్రెసు నాయకుడిగా బాధతో మాట్లాడుతున్నానని ఆయన అన్నారు. అయితే, జగన్ తో తాను ఏకీభవిస్తున్నానని ఆయన చెప్పారు.