రోశయ్యతో పాటు కేశవరావుకూ సోనియా ఢిల్లీ పిలువు

హైదరాబాద్: కాంగ్రెసు సీనియర్ నేత కె. కేశవ రావుకు కూడా పార్టీ అధ్యక్షురాలు సోనియా గాంధీ నుంచి పిలుపు వచ్చినట్లు సమాచారం. ముఖ్యమంత్రి కె. రోశయ్యతోపాటు ఢిల్లీకి రావాలని సోనియా గాంధీ నుంచి కేశవరావుకు పిలుపు రావడంతో ఊహాగానాలకు రెక్కలు వచ్చాయి. రాష్ట్రంలో పరిష్కరించాల్సిన సమస్యలు చాలా ఉన్నాయి. ఈ స్థితిలో కేశవరావును కూడా ఆహ్వానించడంలోని ఆంతర్యమేమిటనేది అంతు పట్టడం లేదు. కేశవరావుకు ఏమైనా ముఖ్యమైన బాధ్యతలు అప్పగిస్తారా, రోశయ్యతో పాటు కేశవరావుతో కూడా చర్చించి రాష్ట్ర సమస్యలపై నిర్ణయాలు తీసుకుంటారా అనేది తెలియడం లేదు.

రోశయ్య ఈ నెల 10వ తేదీన ఢిల్లీ వెళ్తున్నారు. 11వ తేదీన ఆయన సోనియాను కలుస్తారు. ఈ భేటీలో మంత్రివర్గ విస్తరణతో పాటు కడప పార్లమెంటు సభ్యుడు వైయస్ జగన్ వ్యవహారశైలిపై చర్చ జరుగుతుందని, అందుకు పార్టీ నిర్దిష్టమైన చర్యలు తీసుకోవడానికి సిద్ధపడి రోశయ్య సలహాలు తీసుకుంటారని అంటున్నారు. పిసిసి అధ్యక్షడి నియామకం కూడా జరగాల్సి ఉంది. తెలంగాణ అంశం పెండింగులోనే ఉంది. దాని పరిష్కారానికి డిసెంబర్ తర్వాత కూడా కొంత సమయం కాంగ్రెసు అధిష్టానానికి దక్కుతుంది.

ఈ స్థితిలో తెలంగాణ సమస్య పరిష్కారానికి అనుగుణంగా సర్గుబాట్లు, ఏర్పాట్లు చేయడానికే కేశవరావును ఢిల్లీకి పిలిపిస్తున్నారా అనే సందేహం కూడా కలుగుతోంది. తెలంగాణ కాంగ్రెసు నాయకులకు దాదాపుగా కేశవ రావు నాయకత్వం వహిస్తున్నారు. అందువల్ల ఆయనతో చర్చించాలనే ఉద్దేశంతో పార్టీ అధిష్టానం ఉన్నట్లు చెబుతున్నారు. పైగా, కేశవరావు ఇటీవలి కాలంలో అధిష్టానం విశ్వాసాన్ని చూరగొన్నారు.