ఆంధ్రజ్యోతి డైలీపై అగ్గి మీద గుగ్గిలమైన కె. చంద్రశేఖర రావు

వరంగల్: ఆంధ్రజ్యోతి దినపత్రికపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు అగ్గి మీద గుగ్గిలమయ్యారు. ఆ పత్రికపై తీవ్రంగా మండిపడ్డారు. తెలంగాణ ఇవ్వకపోతే మానవ బాంబులవుతామని తాను అన్నట్లు ఆ పత్రిక రాయడాన్ని తీవ్రంగా తప్పు పట్టారు. తాను ఆ విధంగా అనలేదని ఆయన స్పష్టం చేశారు. తెలంగాణ ఉద్యమాన్ని దెబ్బ తీయడానికి ఆ పత్రిక కుట్ర చేస్తోందని ఆయన అన్నారు. సీమాంధ్ర మీడియా తెలంగాణ ఉద్యమంపై కుట్ర చేస్తోందని ఆయన అన్నారు. తెలంగాణ వార్తలను అందించడానికి త్వరలోనే నమస్తే తెలంగాణ పేరుతో పత్రిక వస్తోందని ఆయన చెప్పారు. డిసెంబర్ తర్వాత అవసరమైతే మళ్లీ తాను ఆమరణ నిరాహార దీక్ష చేస్తానని ఆయన చెప్పారు. అలాంటి ఉధృతమైన ఉద్యమాన్ని ఈ డిసెంబరు తరువాత కూడా నిర్మించేందుకు ఏం చేయాలనేది మేధావులు ప్రణాళిక చేస్తున్నారు. తెలుగుదేశ నాయకుడు నేత, హన్మకొండ మాజీ ఎంపీ చాడ సురేష్‌రెడ్డి శనివారం తన అనుచరులతో తెరాసలో చేరారు. ఈ సందర్భంగా శనివారం వరంగల్‌లో జరిగిన సభలో కేసీఆర్‌ మాట్లాడారు. ఉద్యమాన్ని ప్రజల్లోకి తీసుకెళ్ళేందుకు ముందస్తుగా డిసెంబరులో భారీ బహిరంగ సభను వరంగల్‌లో ఏర్పాటు చేయనున్నట్టు ప్రకటించారు.

సూక్ష్మరుణ సంస్థల కబంధహస్తాల్లో చిక్కుకున్న బాధితులు ఆత్మహత్యలకు పాల్పడుతున్నారని, అసలు తెలంగాణ బతుకే ఆత్మహత్యల బతుకయ్యిందని, రైతులు, చేనేతలు, విద్యార్థులు, అప్పులుతీసుకున్న పేదలూ ఆత్మహత్య చేసుకుంటున్నారని కేసీఆర్‌ అన్నారు. వరంగల్‌లో కొద్ది రోజుల క్రితం సూక్ష్మరుణ సంస్థల వేధింపులకు తట్టుకోలేక మౌనిక అనే విద్యార్థి ఆత్మహత్యచేసుకున్నారని, ఆమె కుటుంబాన్ని ఆదుకోవాలని, మైక్రోఫైనాన్సుల బారినుంచి తెలంగాణ ప్రజలను కాపాడాలంటూ కొందరు మహిళలు, బాలికలు ప్లకార్డులతో కేసీఆర్‌ ముందుకు వచ్చారు. సూక్ష్మరుణ సంస్థల వద్ద పేదలు తీసుకున్న రుణాలపై మారటోరియం విధించాలని ఆయన ముఖ్యమంత్రిని డిమాండ్ చేశారు. ఈ సందర్భంగా తనకొకటి గుర్తుకొస్తున్నదంటూ గ్రూప్ వన్ పరీక్ష నిర్వహణ తీరును ఆయన గుర్తు చేశారు. 54 ఏండ్లలో ఆంధ్రావాళ్ళు ఎప్పుడన్నా బతుకమ్మ ఆడారని, కానీ ఇప్పుడు విజయవాడలో బతుకమ్మ ఆడుతున్నామని లగడపాటి అంటున్నాడని, విజయవాడలో కాదు.. కనీసం హైదరాబాద్‌లో 30, 40 ఏండ్ల నుంచి ఉంటున్న ఆంధ్రావాళ్ళన్నా ఎప్పుడన్నా బతుకమ్మ ఆడారా అని కేసీఆర్‌ ప్రశ్నించారు.