మైనర్ బాలికతో పెళ్లి వల్లే ఆర్టీసి ఉద్యోగి బాలగంగాధర్ హత్య?

రాజమండ్రి: విజయవాడలోని పాతబస్తీలో గల టెక్సో లాడ్జిలో ఆర్టీసి ఉద్యోగి బాలగంగాధర్ హత్యకు మైనర్ బాలికతో పెళ్లే కారణమని అనుమానిస్తున్నారు. మైనర్ బాలికను పెళ్లి చేసుకుని ఆమెకు తన అస్తి అంతా కట్టబెడతానని ఇచ్చిన హామీ వల్లనే అతను హత్యకు గురైనట్లు ప్రచారం జరుగుతోంది. అతని కొడుకు స్వామి ఈ దారుణానికి ఒడిగట్టి ఉంటాడని పోలీసులు భావిస్తున్నారు. స్వామి కోసం పోలీసులు గాలిస్తున్నారు. సినిమాకని వెళ్లిన స్వామి ఇప్పటి వరకు తిరిగి రాలేదని తెలుస్తోంది. ఈ ఏడాది జూన్ 17వ తేదీన కొవ్వూరుకు చెందిన ఓ మైనర్ బాలికను బాలగంగాధర్ పెళ్లి చేసుకున్నాడు. ఇది రచ్చ కావడంతో పోలీసులు అతన్ని అరెస్టు చేశారు. అతను ఈ కేసులో నిందితుడు.

మైనర్ బాలికను స్వధార హోమ్ కు చేర్చారు. ఆ తర్వాత ఆమెను హైదరాబాదుకు తరలించినట్లు సమాచారం. అయితే, ప్రస్తుతం ఆమె బాలగంగాధర్ లో రాజమండ్రిలో ఉంటున్నట్లు కూడా ఊహాగానాలు చెలరేగుతున్నాయి. రాజమండ్రి డిపోలో బాలగంగాధర్ పనిచేస్తున్నాడు. అయితే అతను రాజమండ్రిలో ఎక్కడ ఉంటున్నాడనే తెలియడం లేదు. ఆ ఇల్లు ఆచూకీ దొరికితే తప్ప మైనర్ బాలిక అతనితో ఉంటుందా లేదా అనే తెలుసుకోవడం సాధ్యం కాదు. కొవ్వూరులో మైనర్ బాలిక తల్లిదండ్రులు కూడా లేరు.

మైనర్ బాలికను పెళ్లి చేసుకోవడం తప్ప బాలగంగాధర్ పై ఇతర చెడు వ్యవహారాలు ఉన్నట్లు లేవు. అతను ఆర్టీసి యూనియన్ కార్యకలాపాల్లో చురుగ్గా పాల్గొనేవాడు. నేషనల్ మజ్దూర్ యూనియన్ లో పనిచేసేవాడు. తాను పదవీవిరమణ చేయడం ద్వారా వచ్చే డబ్బులు ఇస్తానని చెప్పి బాలగంగాధర్ మైనర్ బాలికను పెళ్లి చేసుకున్నట్లు సమాచారం. భార్య మరణించడంతో అతను ఈ పెళ్లి చేసుకున్నట్లు తెలుస్తోంది. ఈ కారణంగానే స్వామి తండ్రిని హత్య చేసి ఉంటాడని అనుమానిస్తున్నారు.