తెలంగాణపై నాగం ఒంటరే: ఢిల్లీ యాత్రపై మొండిచేయి

హైదరాబాద్: ప్రత్యేక తెలంగాణ కోసం తెలుగుదేశం పార్టీ అధ్వర్యంలో చేపట్టిన ధర్నాకు తెలంగాణ రాష్ట్ర సమితి అధినేత కె.చంద్రశేఖరరావుతో పాటుగా రాష్ట్రంలోని అన్ని పార్టీల నేతలకు లేఖలు రాశామని తెలుగుదేశం పార్టీ పోలిట్ బ్యూరో సభ్యుడు నాగం జనార్ధన్ రెడ్డి సోమవారం తెలుగుదేశం పార్టీ కార్యాలయంలో చెప్పారు. అయితే తమ లేఖకు ఇంత వరకు ఏ పార్టీ స్పందించలేదని చెప్పారు. తెలంగాణపై నిరంతరం మాట్లాడుతున్న వారు కూడా స్పందించకపోవడాన్ని ఆయన ప్రశ్నించారు. సోనియా గాంధీ ఇంటివద్ద 25న ధర్నా ఉంటుందన్నారు. ధర్నా కోసం ఈ నెల 23నే ఢిల్లీకి బయలుదేరుతామంటున్నారు. ప్రత్యేక తెలంగాణ రాష్ట్రం కోసం వినతి పత్రం ఇవ్వడానికి సోనియాగాంధీని, మన్మోహన్ సింగ్ లను కోరినప్పటికీ ఇప్పటికీ తమకు అపాయింట్ మెంట్ ఇవ్వలేదన్నారు.

గద్దర్ కు పెట్టిన తెలంగాణ ఫ్రంట్ రాజకీయ పార్టీ కానందున ఆయనకు లేఖ రాయలేదని నాగం చెప్పారు. ఆయన ఫ్రంట్ రాజకీయ పార్టీగా రూపాంతరం చెందినప్పుడు దాని గూర్చి ఆలోచిస్తామని, ప్రస్తుతం ఆయన తెలంగాణ కోసం రాజకీయేతర ఉద్యమాన్ని నిర్మిస్తున్నారన్నారు. ఆయన తదుపరి కార్యాచరణ చూసిన తర్వాత ఏదైనా మాట్లాడవచ్చునని చెప్పారు. తెలంగాణ అంశంపై తెలుగుదేశం పార్టీకి రాజకీయ పార్టీలన్నీ మొండిచేయే చూపాయని, దీంతో తెలుగుదేశం పార్టీ తెలంగాణ అంశంపై ఒంటరిగా మిగిలిపోయింది.