ఆ రెండు పార్టీలు ప్రభుత్వాన్ని పడగొట్టాలనుకుంటున్నాయి

హైదరాబాద్: కర్ణాటకలోని భారతీయ జనతా పార్టీ ప్రభుత్వాన్ని పడగొట్టి రాష్ట్రపతి పాలన కోసం కాంగ్రెస్, జెడి(ఎస్) పార్టీలు కుయుక్తులు పన్నుతున్నాయని ఆ పార్టీ సీనియర్ నాయకుడు వెంకయ్యనాయుడు ఆరోపించారు. ప్రజల ఓట్లతో గెలిచిన పార్టీని వారు పడగొట్టాలని చూస్తే ప్రజలు వారికి బుద్ది చెబుతారని హెచ్చరించారు. ఆంధ్రప్రదేశ్ లో తెలుగు లలిత కళాతోరణానికి పేరు మార్చాల్సిన అవసరం ఏమొచ్చిందని ఆయన ప్రశ్నించారు. రోశయ్యలాంటి సీనియర్, అనుభవజ్ఞుడు ముఖ్యమంత్రిగా ఉన్న కాలంలో పేరు మార్చటం శోచనీయమన్నారు.

మైక్రో ఫైనాన్సుల(సూక్ష్మరుణ సంస్థల) వేధింపులకు ప్రభుత్వమే బాధ్యత వహించాలన్నారు.ప్రజలకు రుణాలు తీసుకోవడానికి సరియైన సదుపాయాలు ప్రభుత్వం కల్పించనందునే ప్రజలు సూక్ష్మరుణసంస్థలలో అధిక వడ్డీకీ డబ్బులు వేధింపులకు గురవుతున్నారన్నారు. సూక్ష్మ రుణ సంస్థల వేధింపులు అరికట్టాలంటే ప్రతి గ్రామంలో బ్యాంకు, ప్రతి వ్యక్తికి బ్యాంకు అకౌంటును ప్రభుత్వం అందుబాటులోకి తీసుకు రావాలని చెప్పారు.

విజయవాడ -గుంటూరుల మధ్య హైకోర్టు బెంచ్ కోసం పోరాడుతున్న సీమాంధ్ర న్యాయవాదుల న్యాయపరమైన డిమాండ్ ను ప్రభుత్వం పరిశీలించాలని భారతీయ జనతా పార్టీ రాష్ట్ర అధ్యక్షుడు, అంబర్ పేట ఎమ్మెల్యే కిషన్ రెడ్డి అన్నారు. వెంటనే ప్రభుత్వం గుంటూరులో హైకోర్టు బెంచ్ ను ఏర్పాటు చేయాలని చెప్పారు.