పేరు మార్చడానికి టి. సుబ్బిరామిరెడ్డి పది కోట్లు ఇచ్చారా?

హైదరాబాద్: హైదరాబాదులోని తెలుగు లలిత కళాతోరణం పేరు మార్చడానికి కాంగ్రెసు నాయకుడు టి. సుబ్బిరామిరెడ్డి పది కోట్ల రూపాయలు ఇచ్చినట్లు తెలుస్తోంది. తెలుగు లలిత కళాతోరణాన్ని ప్రభుత్వం రాజీవ్ గాంధీ లలిత కళాతోరణంగా మార్చడానికి ఉత్తర్వులు జారీ చేసింది. దీన్ని వ్యతిరేకిస్తూ సిపిఐ రాష్ట్ర కార్యదర్శి కె. నారాయణ తీవ్రమైన వ్యాఖ్యలు చేశారు. ఆయన బుధవారం లలిత కళాతోరణాన్ని సందర్సించారు. టి. సుబ్బిరామిరెడి పది కోట్ల రూపాయలు ఇస్తే పేరు మారుస్తారా అని ఆయన ప్రశ్నించారు. అండర్ వరల్డ్ డాన్ దావూద్ వంద కోట్లు ఇస్తే పేరు మారుస్తారా అని ఆయన వ్యంగ్యంగా అడిగారు. కళా సంస్థలకు కళాకారుల పేర్లు పెట్టాలి గానీ రాజకీయ నాయకుడైన రాజీవ్ గాంధీ పేరు పెట్టడమేమిటని ఆయన అన్నారు.

తెలుగు లలిత కళాతోరణం పేరు మారిస్తే బోర్డును పీకివేస్తామని నారాయణ అన్నారు. పార్టీ ఎంపీ అజీజ్‌పాషాతో కలిసి ఈరోజు లలిత కళాతోరణాన్ని ఆయన సందర్శించారు. కాంగ్రెస్‌ నేత సుబ్బిరామిరెడ్డికి అంతగా దానం చేయాలని ఉంటే మురికివాడల్లో మరుగుదొడ్లు నిర్మించి రాజీవ్‌, ఇందిరల పేర్లు పెట్టాలని నారాయణ సూచించారు. పేరు మార్చాలనుకుంటే సాహిత్యసేవ చేసిన సుద్దాల హనుమంతు, సురవరం ప్రతాపరెడ్డి లాంటి వారి పేర్లు పెట్టాలని సూచించారు.