కెటిఆర్ గుంటూరులో ఎందుకు చదివాడు: తులసిరెడ్డి

హైదరాబాద్: తెలంగాణపై తనకు ఒక్కడికే ప్రేమ ఉన్నట్టు మరెవ్వరికీ లేనట్లు తెలంగాణ రాష్ట్ర సమితి అధినేత కె చంద్రశేఖర రావు ఫోజులు కొడుతున్నాడని కాంగ్రెస్ పార్టీ ఆధికార ప్రతినిధి, సీమాంధ్ర నాయకుడు తులసీరెడ్డి ధ్వజమెత్తారు. తెలుగు దేశం పార్టీ హయాంలోనే ట్యాంకుబండ్ పైన ఇప్పుడున్న విగ్రహాలను నెలకొల్పారని అప్పుడు తెలుగు దేశం పార్టీలోనే ఉన్న కెసిఆర్ కు తెలియదా అని ఆయన ప్రశ్నించారు. అప్పుడు మైండ్ సెట్ పని చేయలేదా అన్నారు. ఆదివాసీల కోసం పోరాడిన యోధుడు కొమురం భీం విగ్రహాన్ని ఏర్పాటు చేయడాన్ని ఎవరూ వ్యతిరేకించరని అన్నారు.

అయితే దానికి ట్యాంకుబండ్ పైన ఉన్న విగ్రహాలను కూల్చుతామని చంద్రశేఖర రావు కుమారుడు, సిరిసిల్ల శాసనసభ్యుడు కె తారకరామారావు అనడం శోచనీయమన్నారు. కె తారకరామారావును గుంటూరులో ఇంటర్మిడియేట్ చదివి విదేశాల్లో ఉద్యోగం చేశాడన్నారు. తెలంగాణపై ప్రేమ ఉన్న వారి కుటుంబానికి తెలంగాణ ప్రాంతంలో జూనియర్ కళాశాలలు కనిపించలేదా అని ప్రశ్నించారు.