దక్షిణ కోస్తాకు తుఫాను ముప్పు: అండమాన్ వద్ద వాయుగుండం

విశాఖపట్నం: ఆంధ్రప్రదేశ్ లోని దక్షిణ కోస్తాకు తుఫాను ముప్పు పొంచి ఉంది. ప్రస్తుతం వాయుగుండం మచిలీపట్నానికి 1500 కిలోమీటర్ల దూరంలో అండమాన్ దీవుల వద్ద కేంద్రీకృతమై ఉంది. అది మెల్లగా కదులుతోంది. అది క్రమంగా బలపడి తుఫానుగా, ఆ తర్వాత పెను తుఫానుగా మారే ప్రమాదం ఉందని అంచనా వేస్తున్నారు. అది సూపర్ సైక్లోన్ గా కూడా మారవచ్చునని హెచ్చరిస్తున్నారు. అయితే, ఇప్పుడే దాని ప్రభావంపై కచ్చితంగా చెప్పలేమని వాతావరణ పరిశోధనా కార్యాలయం అధికారులు అంటున్నారు. మచిలీపట్నానికి 400 కిలోమీటర్ల దూరంలోకి వచ్చినప్పుడు దాని ప్రభావాన్ని అంచనా వేయగలమని అంటున్నారు.

మెల్లగా కదులుతున్న వాయుగుండం శుక్రవారం సాయంత్రానికి గానీ శనివారం ఉదయానికి గానీ తీరాన్ని తాకే అవకాశం ఉందని అంటున్నారు. అది బంగాళాఖాతంలో పశ్చిమ వాయువ్య దిశగా కదులుతోంది. దీన్ని బట్టి దక్షిణ తమిళనాడు, దక్షిణ ఆంధ్రా తీరం వద్ద తీరం దాటవచ్చునని అంచనా వేస్తున్నారు. మచిలీపట్నానికి 400 కిలోమీటర్ల దూరంలోకి వచ్చినప్పుడు తీరం వెంబడి పెనుగాలులు వీస్తాయి. నష్టం భారీగా ఉంటుందని అంచనా వేస్తున్నారు. రానున్న తుఫానుకు జలం అని శాస్త్రవేత్తలు పేరు పెట్టారు.