పాలమూరు జిల్లాలో ప్రేమోన్మాదిని ఊరేగించి చెప్పులతో కొట్టిన గ్రామస్థులు

మహబూబ్ నగర్: ప్రేమ పేరుతో గత రెండు నెలలుగా పదో తరగతి చదువుతున్న బాలికను వేధిస్తున్న సత్తార్ అనే యువకుడికి పోలీసులు చెప్పు దెబ్బలతో బుద్ధి చెప్పారు. ఆ యువకుడిని గ్రామంలో ఊరేగించి అతన్ని చెప్పులతో కొట్టారు. అతనికి గుండు చేసి ఊరేగించే ప్రయత్నం కూడా చేశారు. మహబూబ్ నగర్ జిల్లా ఆత్మకూరు మండలం అమరచింత గ్రామంలో ఈ సంఘటన జరిగింది.

తనను ప్రేమించకపోతే ముఖంపై యాసిడ్ పోస్తానని సత్తార్ ఆ బాలికను వేధిస్తూ వస్తున్నాడు. ఆ బెదిరింపులకు భయపడిన బాలిక కొన్నాళ్లు హైదరాబాదులోని తన బంధువుల ఇంట్లో తలదాచుకుంది. చదువు పాడవుతుందనే ఉద్దేశంతో ఆ బాలిక తిరిగి గ్రామానికి వచ్చింది. దీంతో అతను మళ్లీ వేధించడం మొదలు పెట్టాడు. ఆ విషయాన్ని బాలిక తల్లిదండ్రులకు, గ్రామస్థులకు చెప్పింది. దీంతో గ్రామస్థులు అతడ్ని చితకబాదారు. అతనితో పాటు మరో ఇద్దరు ఆకతాయిలు కూడా ఉన్నారని బాలిక తల్లిదండ్రులు చెబుతున్నారు. సత్తార్ గ్రామంలో ఆకతాయిగా తిరుగుతుంటాడని గ్రామస్థులు చెప్పారు.