సీమాంధ్రుల విందు వద్దు: శ్రీకృష్ణ కమిటీకీ తెలంగాణ ఎంపీల సూచన

హైదరాబాద్: తెలంగాణ ఉద్యమాన్ని అణిచివేయడానికి పోలీసు శాఖ ఆయుధాలు సమకూర్చుకుంటున్నట్టు వార్తలు వస్తున్నాయని, అలాంటి చర్యలను పోలీసు శాఖ వెంటనే విరమించుకోవాలని తెలంగాణ కాంగ్రెస్ పార్లమెంటు సభ్యులు గుత్తా సుఖేందర్ రెడ్డి, పొన్నం ప్రభాకర్ డిమాండ్ చేశారు. డిసెంబర్ తర్వాత పరిస్థితులు క్లిష్టంగా ఉంటాయని, అందుకు పోలీసు శాఖ సిద్ధంగా ఉందన్న డిజిపి వాఖ్యలు కూడా అందుకు నిదర్శనమని వారు అన్నారు. పోలీసు శాఖ ఉద్యమాన్ని దెబ్బతీయాలని చూస్తే ఊరుకునేది లేదన్నారు.

శ్రీకృష్ణ కమిటీ సీమాంధ్రులు ఇస్తానన్న విందుకు హాజరకు కావద్దని వారు సూచించారు. టిజి వెంకటేష్ వంటి సీమాంధ్ర నాయకులు శ్రీకృష్ణ కమిటీని విందుకు పిలిచి మచ్చిక చేసుకోవాలని చూస్తున్నారని వారి విందుకు కమిటీ వెళితే విపరీతార్థాలకు దారి తీస్తుందని వారు అభిప్రాయపడ్డారు.