ఆర్ఎస్ ఎస్ కు సాధన ఎక్కువ, కాంగ్రెసుకు వాదన ఎక్కువ: కోట

మహబూబ్ నగర్: హిందూయిజం అమ్మలాంటిదని, అమ్మని అమ్మ అంటే తప్పేంటని సీని నటుడు కోట శ్రీనివాస రావు కాంగ్రెసు అధినేత్రి సోనియాగాంధీ, ఏఐసిసి ప్రధాన కార్యదర్శి రాహుల్ గాంధీని విమర్శించారు. ఆర్ఎస్ఎస్ కు సాధన ఎక్కువ, కాంగ్రెసు వాదన ఎక్కువ అని విమర్శించారు. రాష్ట్రీయ స్వయంసేవక సంఘ్(ఆర్ఎస్ఎస్) తీవ్రవాద సంస్థ అంటూ సోనియాగాంధీ, రాహుల్ గాంధీ చేసిన వ్యాఖ్యల నిరసనగా ఆర్ఎస్ఎస్ బుధవారం రాష్ట్రవ్యాప్తంగా ధర్నా, ఆందోళన నిర్వహించింది. ఈ ధర్నాలో ఆయా జిల్లా స్థాయి కార్యకర్తలు, ప్రముఖులు పాల్గొన్నారు. వీరికి భారతీయ జనతా పార్టీ సంఘీభావం తెలిపింది.

మహబూబ్ నగర్లోని ధర్నాలో కోట శ్రీనివాస రావు పాల్గొన్నాడు. ఈ సందర్భంగా ఆయన మాట్లాడాడు. కాషాయం తిరగబడితే కొట్టుకుపోతారు. గుర్తుంచుకోండి అని కాంగ్రెసు ని హెచ్చరించారు. ఆర్ఎస్ఎస్ వంటి దేశభక్తి కలిగిన ఒక వ్యవస్థని ఉగ్రవాదిగా ప్రచారం చేస్తే నమ్మడానికి ప్రజలు సిద్ధంగా లేరన్నారు.దేశభక్తిగల ఆర్ఎస్ఎస్ కు దేశద్రోహం తలపెట్టే టెర్రరిస్టులకు కాంగ్రెస వారికి, ముఖ్యంగా సోనియా గాంధీ, రాహుల్ గాంధీలకు తేడా తెలియకపోవటం విచారకరమని పలువురు భాజపా నాయకులు పేర్కొన్నారు. సిమితో ఆర్ఎస్ఎస్ ను పోల్చి రాహుల్ గాంధీ తనకు మిడిమిడి జ్ఞానం ఉందని నిరూపించుకున్నాడన్నారు. ఆయా జిల్లాల్లో ప్రభుత్వ కార్యాలయాల వద్ద ధర్నా నిర్వహించారు. మహబూబ్ నగర్ జిల్లాలో భారతీయ జనతా పార్టీ రాష్ట్ర అధ్యక్షుడు, అంబర్ పేట శాసనసభ్యుడు కిషన్ రెడ్డి, మాజీ భాజపా అధ్యక్షుడు బండారు దత్తాత్రేయ, సినీనటుడు కోట శ్రీనివాసరావు, ఆలె నరేంద్ర తదితరులు పాల్గొన్నారు.