వైయస్ జగన్ జగతి పబ్లికేషన్స్ పై ఆదాయం పన్ను శాఖ కన్ను

హైదరాబాద్: ఎమ్మార్ అక్రమాలపై ఆదాయపు పన్ను శాఖ దృష్టి సారించింది. కడప ఎంపీ వైఎస్ జగన్‌కు చెందిన 'సాక్షి' పత్రిక ప్రచురణ సంస్థ జగతి పబ్లికేషన్‌పైనా కన్ను వేసింది. ఈ రెండు సంస్థలపై త్వరలో ఐటీ దాడులు జరిగే అవకాశం కనిపిస్తోంది. ప్రస్తుతానికి ఎమ్మార్ ప్రాపర్టీస్‌లో ప్లాట్లు, విల్లాలు కొనుగోలు చేసిన వారికి ఐటీ నోటీసులు జారీ చేసినట్టు విశ్వసనీయంగా తెలిసింది. ఈ మేరకు ఓ ప్రముఖ తెలుగు దినపత్రికలో ఓ వార్తాకథనం ప్రచురితమైంది.ఎమ్మార్ ప్రాపర్టీస్ కార్యాలయంలో ఇటీవల విజిలెన్స్, ఎన్‌ఫోర్స్‌మెంట్ విభాగం అధికారులు తనిఖీలు జరిపారు. కొన్ని రికార్డులను స్వాధీనం చేసుకున్నారు. ఈ వివరాలను కూడా ఐటీ శాఖ కూడా తెప్పించుకుని పరిశీలిస్తోంది. కొనుగోలుదారుల జాబితాను సిద్ధం చేసి వారందరికీ ఐటీ అధికారులు నోటీసులు జారీ చేశారు. "కోట్ల విలువైన ఆస్తులను ఎలా కొన్నారు? డబ్బు ఎక్కడిది?ఈ నెలాఖరులోగా బదులివ్వండి'' అని ఆదేశించారు.

ఎమ్మార్ హిల్స్ టౌన్‌షిప్‌లో ప్లాట్లు, విల్లాలు కొనుగోలు చేసిన ప్రముఖులలో ప్రభుత్వ సలహాదారు కేవీపీ రామచంద్రరావు సతీమణి కోటగిరి సునీత, టీడీపీ అధ్యక్షుడు చంద్రబాబు కోడలు బ్రహ్మణి, మంత్రి గల్లా అరుణకుమారి, సినీ హీరో కృష్ణ, పీసీసీ అధ్యక్షుడు డి.శ్రీనివాస్, వైఎస్ సోదరుడు సుధీకరరెడ్డి సతీమణి విద్యారెడ్డి తదితర ప్రముఖులు ఉన్నారు. ఇక్కడ చదరపు గజం స్థలం రూ.40 వేల వరకు ఉండగా..డాక్యుమెంట్లలో మాత్రం రూ.5 వేలుగా చూపారు. వైఎస్ జగన్‌కు చెందిన జగతి పబ్లికేషన్‌పైనా ఆదాయపు పన్ను శాఖ దృష్టి సారించింది. జగతిలో పెట్టుబడులు పెట్టిన వారెవరు? ఎంత మేరకు పెట్టారు? వారి ఆస్తుల వివరాలేంటి? అనే అంశాలపై ఆరా తీస్తోంది. పైకి దమ్మిడి ఆదాయం లేని కొన్ని కంపెనీలు జగతి సంస్థలో భారీగా పెట్టుబడులు పెట్టాయి. పొట్లూరి వరప్రసాద్ (మారిషస్)కు చెందిన పీవీపీ వెంచర్స్, క్యూబైడ్, పీవీపీ బిజినెస్ టవర్స్ సంస్థలు జగతిలో భారీగా పెట్టుబడులు పెట్టాయి. తమ బ్యాలెన్స్ షీట్లలో నష్టాలున్నప్పటికీ కోట్లాది రూపాయలను కుమ్మరించాయి.