చంద్రబాబు టార్గెట్: నాడు దేవేందర్ గౌడ్, నేడు నాగం జనార్దన్ రెడ్డి

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు వ్యవహార శైలిలో ఏ మాత్రం మార్పు రాలేదు. పార్టీలో స్వేచ్ఛగా గొంతెత్తే నాయకులను అణచివేయడంలో ఆయన పాత పద్ధతినే అనుసరిస్తున్నట్లున్నారు. తెలంగాణ విషయంలో ఆయన అదే పద్ధతిని అనుసరిస్తున్నారనే అభిప్రాయం వ్యక్తమవుతోంది. తనకు నచ్చని నాయకుడికి మరో నాయకుడిని ఎదురు పెట్టడం ఆయనకు నచ్చిన విద్య అంటారు. ప్రస్తుతం తెలంగాణకు అనుకూలంగా చురుగ్గా వ్యవహరిస్తున్న నాగం జనార్దన్ రెడ్డిని పార్టీలో అణచేయడానికి చంద్రబాబు పాత వ్యూహాన్నే అనుసరిస్తున్నారనే విమర్శ వినిపిస్తోంది. నాగం జనార్దన్ రెడ్డికి వ్యతిరేకంగా మీడియాలో వార్తలు రావడం కూడా ఇందుకు నిదర్శనంగా చెబుతున్నారు. చంద్రబాబుకు నచ్చని నాయకులపై ఆయనకు అనుకూలమైన మీడియాలో వార్తాకథనాలు రావడం కూడా పరిపాటే. ఇప్పుడు నాగం జనార్దన్ రెడ్డి విషయంలో అదే జరుగుతోంది. చంద్రబాబుకు, నాగం జనార్దన్ రెడ్డికి మధ్య దూరం పెరుగుతోందని కొద్ది రోజులుగా వార్తాకథనాలు వస్తున్నాయి. చంద్రబాబు అంతరంగాన్ని ఆ వార్తాకథనాలు ఆవిష్కరిస్తాయని అంటారు.

నాగం జనార్దన్ రెడ్డిపైకి ఇప్పుడు తెలంగాణకు చెందిన దేవేందర్ గౌడ్, నామా నాగేశ్వర రావులను చంద్రబాబు ఉసిగొల్పుతున్నారనే ప్రచారం జరుగుతోంది. గతంలో తెలంగాణకు పార్టీ అనుకూలంగా నిర్ణయం తీసుకోవాలని దేవేందర్ గౌడ్ గొంతెత్తినప్పుడు నాగం జనార్దన్ రెడ్డిని చంద్రబాబు ఎగేశారని అంటారు. ఒకరికి వ్యతిరేకంగా మరొకరిని వాడుకోవడం చంద్రబాబు వ్యూహంలో ఒక భాగమని చెబుతున్నారు. వారిద్దరిని ప్రయోగించి నాగం జనార్దన్ రెడ్డిని చంద్రబాబు ఉక్కిరి బిక్కిరి చేస్తున్నారని అంటున్నారు. పార్టీ సమావేశాల్లో నాగం జనార్దన్ రెడ్డికి వ్యతిరేకంగా తాను మాట్లాడడమే కాకుండా ఇతర నాయకుల చేత కూడా చంద్రబాబు మాట్లాడిస్తున్నట్లు ఊహాగానాలు చెలరేగుతున్నాయి. పాత్రలు అవే, నాటకం అదే, కానీ నటులే తారుమారయ్యారనే మాట వినిపిస్తోంది.