వైయస్ జగన్ ఇష్యూ: ప్రధాని మన్మోహన్ సింగ్ తో చిరంజీవి భేటీ

హైదరాబాద్‌: ప్రజారాజ్యం పార్టీ అధ్యక్షుడు చిరంజీవి రేపు మంగళవారం ఢిల్లీ వెళ్తున్నారు. ఆయనకు ప్రధాని డాక్టర్ మన్మోహన్ సింగ్ అపాయింట్ మెంట్ లభించింది. పోలవరం ప్రాజెక్టుపై ప్రధానితో చర్చించేందుకు చిరంజీవి ఢిల్లీ వెళ్తున్నారు. పోలవరం ప్రాజెక్టుకు జాతీయ హోదా ఇవ్వాలని చిరంజీవి విజ్ఞప్తి చేస్తున్నారు. అయితే, అకస్మాత్తుగా దానికి కేంద్ర పర్యావరణ శాఖ మంత్రి జైరాం రమేష్ బ్రేకులు వేశారు. దీంతో పోలవరం ప్రాజెక్టుకు అడ్డంకులు కల్పించవద్దని కోరడానికి తాను ప్రధానిని కలుస్తానని ఇది వరకు చిరంజీవి చెప్పారు. ఈ స్థితిలో ఆయనకు ఢిల్లీ నుంచి అహ్వానం అందింది.

వైయస్ జగన్ వ్యవహారం ముదిరి పాకాన పడడంతో చిరంజీవి ఢిల్లీ పర్యటనకు, ప్రధానితో భేటీకి ప్రాధాన్యం చేకూరినట్లు భావిస్తున్నారు. రాష్ట్రంలో కాంగ్రెసు ప్రభుత్వం పడిపోయే పరిస్థితి వస్తే తాను ఆదుకుంటానని చిరంజీవి గతంలో ప్రకటించారు. ఈ మేరకు వైయస్ జగన్ నుంచి ప్రభుత్వాన్ని కాపాడుకోవడానికి కాంగ్రెసు అధిష్టానం చిరంజీవి నుంచి మరోసారి హామీ తీసుకునే అవకాశం ఉందని అంటున్నారు. రేపు మంగళవారం ముఖ్యమంత్రి రోశయ్య కూడా ఢిల్లీకి వెళ్తుండడం కూడా గమనించాల్సి ఉంది.