వైయస్సార్ ఆర్థికంగా హద్దులు దాటేవారు: ముఖ్యమంత్రి రోశయ్య

విజయవాడ: ముఖ్యమంత్రిగా వైయస్ రాజశేఖర రెడ్డి ఉన్నప్పుడు ఆర్థిక హద్దులు దాటేవారని అన్నారు. అయితే వైయస్సార్ ఎంతో ధైర్యంగా ఉండేవారన్నారు. కానీ, ఆ ప్రభావంతో రాష్ట్రం ఎలాంటి పరిస్థితులు అనుభవిస్తుందో ఇప్పుడు చూడాల్సి వస్తోందని వ్యాఖ్యానించారు. 'నేను మీ వాడిని. ఎన్ని కష్టాలైనా ఎదురొడ్డి ముఖ్యమంత్రిగా పనిచేయగలుగుతున్నానంటే అది మీ అందరి ఆశీస్సులతోనే. ఒక సీఎంగా నేను అందరివాడిని. రాష్ట్రాభివృద్ధికి, జన సౌభాగ్యం కోసం పాటుపడాలన్నది నా అభిమతం' అని ముఖ్యమంత్రి కె.రోశయ్య అన్నారు. ఆంధ్ర రాష్ట్ర ఆర్యవైశ్య మహాసభ ఆధ్వర్యంలో ఆదివారం సాయంత్రం జరిగిన రాష్ట్ర ఆర్యవైశ్య సమ్మేళనంలో ఆయన మాట్లాడారు. 59 ఏళ్ళ సుదీర్ఘ రాజకీయ జీవితంలో చాలా కాలం మంత్రి పదవి నిర్వహించిన తనకు అనుకోకుండా సీఎంగా అవకాశం వచ్చిందన్నారు. తనకన్నా సమర్థులైన వాళ్ళు లేరని అనటం లేదని, తనకంటే సీనియర్లు చాలా మంది ఉన్నా అవకాశం తనకు దక్కిందన్నారు.

వ్యక్తిగా వైశ్యుల కోసం కృషి చేస్తానని, సీఎంగా రాష్ట్రాభివృద్ధికి కృషి చేస్తానని చెప్పారు. తాను నిద్రలో కూడా అనుకోని పరిణామం నేపథ్యంలో, రాష్ట్రాన్ని పాలించాల్సిందిగా అధిష్ఠానం తనపై బాధ్యతలు మోపిందన్నారు. గత ఏడాది సెప్టెంబరు 3న రాష్ట్రంలోని 80 శాతం మండలాలు తీవ్ర దుర్భిక్షంలో కొట్టుమిట్టాడుతున్నాయన్నారు. వీటిని సరిదిద్దే పనుల్లో తలమునకలై ఉంటే అక్టోబరు నెలలో కృష్ణానదికి ఎంతటి వరదలు వచ్చాయో తెలిసిన విషయమేనన్నారు. క్షణం కూడా తీరిక లేకుండా తలమునకలై ఆ పరిస్థితిని గట్టెక్కించానన్నారు. ఇదే సందర్భంలో పాతబస్తీలో ఘర్షణలు, రాష్ట్ర విభజన ఉద్యమ సెగలు.. ఇలా ఎన్నో సమస్యలు రాష్ట్రంలో అలజడి రేపాయని పేర్కొన్నారు. ఈ పరిస్థితులను సమన్వయం చేసుకుంటూ వస్తున్నానని అన్నారు. ప్రతిపక్షాల సూచనలను తాను పరిగణనలోకి తీసుకుంటానని చెప్పారు. సీఎం పదవిలో ఉన్నా తాను మామూలోడినేనని అన్నారు.

'దేశంలో ఒకే ఒక్క మొనగాడు రోశయ్య' అని సభలో కర్నూలు ఎమ్మెల్యే టి.జి.వెంకటేశ్ అభివర్ణించారు. ఆర్యవైశ్యులు పులి బిడ్డల్లాగా బతకాలన్నారు. పొట్టి శ్రీరాములు విగ్రహాలను ఎవరైనా ధ్వంసం చేస్తే పంజా విప్పాలని ఉద్రేకంగా అన్నారు. కుల సమావేశం నిర్వహించింది రోశయ్యకు సంఘీభావం ప్రకటించడానికేనని చెప్పారు.