సోనియాతో రోశయ్య రహస్య భేటీ: మీడియాకు దూరం

న్యూఢిల్లీ: ముఖ్యమంత్రి కె. రోశయ్య కాంగ్రెసు అధ్యక్షురాలు సోనియా గాంధీతో మంగళవారం రహస్యంగా సమావేశమయ్యారు. సోనియాను తాను కలిసినట్లు కూడా రోశయ్య చెప్పడం లేదు. తాను సోనియాను కలిశానా, లేదా అనే విషయాన్ని చెప్పడానికి కూడా ఆయన ఇష్టపడడం లేదు. తన కాన్వాయ్ ని ముఖ్యమంత్రి ఎపి భవన్ వద్దే ఉంచి, ఒకే వాహనంలో తన సెక్యూరిటీతో పాటు సోనియా నివాసానికి వెళ్లారు. అయితే, సోనియాను రోశయ్య కలిశారా, లేదా అనేది రాష్ట్రానికి చెందిన కాంగ్రెసు పార్లమెంటు సభ్యులు కూడా చెప్పడం లేదు.

ఆయన ఢిల్లీలో తన సమావేశాలకు సంబంధించిన వివరాలను రోశయ్య ఎవరికీ చెప్పడం లేదు. కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలిసిన తర్వాత సోనియాతో రోశయ్య పది నిమిషాల పాటు సమావేశమయ్యారు. రహస్య తన భేటీలను రహస్యంగా ఉంచడంపై అనేక అనుమానాలు తలెత్తుతున్నాయి. రోశయ్య రాజీనామా లేఖ ఇచ్చారని వైయస్ జగన్ వర్గం ప్రచారం సాగిస్తోంది. సోనియాతో సమావేశమైన తర్వాత రోశయ్య తాను ఆ విషయాన్ని ధ్రువీకరించడానికి నిరాకరించారు. తాజా రాజకీయాలపై, మరికొన్ని ముఖ్య విషయాలపై రోశయ్య సోనియాతో మాట్లాడినట్లు వార్తలు వస్తున్నాయి. వైయస్ జగన్ వ్యవహారంపై, మంత్రి వర్గ విస్తరణపై ఆయన సోనియాతో మాట్లాడినట్లు తెలుస్తోంది.