ముఖ్యమంత్రి కిరణ్ కుమార్ రెడ్డి ఢిల్లీ పర్యటన వాయిదా

హైదరాబాద్‌: ముఖ్యమంత్రి నల్లారి కిరణ్ కుమార్ రెడ్డి శుక్రవారం ఢిల్లీ పర్యటన వాయిదా పడింది. శుక్రవారం, శనివారం రోజుల్లో ఏఐసిసి అధ్యక్షురాలు సోనియాగాంధీ ఢిల్లీలో ఉండరు. ఆమె శనివారం సాయంత్రం రావచ్చు. ఆదివారం ఆమె ఎవరికీ అపాయింట్మెంట్ ఇవ్వదు. ఈ కారణంగా ముఖ్యమంత్రి పర్యటన సోమవారం జరిగే అవకాశం ఉంది. శుక్రవారం ముఖ్యమంత్రి సోనియాతో భేటీ ఆయ్యి కృతజ్ఞతలు తెలిపి మంత్రివర్గ విస్తరణ తదితర అంశాలను చర్చించాల్సి ఉండే. అనంతరం రాష్ట్రపతి ప్రతిభా పాటిల్‌, ఉపరాష్ట్రపతి అన్సారీ, లోక్‌సభ స్పీకర్‌ మీరాకుమార్‌, పలువురు కేంద్ర మంత్రులు, ఏఐసీసీ ముఖ్య నాయకులను కలిసే అవకాశముంది.

కాగా ముఖ్యమంత్రి ఢిల్లీ పర్యటన వాయిదా పడటంతో ఆయన శుక్రవారం ఉదయం 11.30 గంటలకు మాజీ ముఖ్యమంత్రి కొణిజేటి రోశయ్యను కలవనున్నారు. ఈ భేటీకి ఎలాంటి ప్రాధాన్యత లేదని కేవలం మర్యాదపూర్వకంగానే ఆయన్ని కలవనున్నట్లు ముఖ్యమంత్రి కార్యాలయ వర్గం పేర్కొంది. ఆ తర్వాత కిరణ్‌కుమార్‌రెడ్డి గవర్నర్ నరసింహన్, హైకోర్టు ప్రధాన న్యాయమూర్తిని కలుస్తారు. సాయంత్రం నాలుగు గంటల నుండి సందర్శకులకు లేక్ వ్యూ గెస్టు హవుస్ లో అందుబాటులో ఉంటారు.