రేపే వైయస్ జగన్ కార్యాచరణ వెల్లడి: కడపలో భారీ బహిరంగ సభ

కడప: కడప పార్లమెంటు సభ్యత్వానికి, కాంగ్రెసు పార్టీ ప్రాథమిక సభ్యత్వానికి రాజీనామా చేసిన వైయస్ జగన్మోహన్ రెడ్డి బుధవారమే తన భవిష్యత్తు కార్యాచరణ ప్రకటించే అవకాశాలు కనిపిస్తున్నాయి. అందుకు ఆయన పూర్తిగా సిద్ధమయినట్లు తెలుస్తోంది. బుధవారం 1వ తారీఖున కడపలో ఓ బహిరంగ సభ ఏర్పాటు చేయనున్నట్లు సమాచారం. ఆ సభలో ముప్పయి అయిదేళ్లుగా అంచెలంచెలుగా తన తండ్రి వైయస్ రాజశేఖరరెడ్డి ఎదగడానికి తోడ్పడిన కాంగ్రెసు నుండి తాను బయటకు రావాల్సిన కారణాలు చెబుతారు.

సభకు వచ్చే కడప జిల్లా, ప్రక్క జిల్లాల ప్రజల ఆశీర్వాదాన్ని, మద్దతును ఆయన కోరుతారు. మొదటినుండి వైయస్ కుటుంబానికి అండగా ఉన్న ప్రజలతో ఆయన మీటింగ్ పెట్టి తన భవిష్యత్తును తెలుపే అవకాశముందని తెలుస్తోంది. అయితే ఆ సభలో పార్టీ ప్రకటన చేయడానికి ఎంత అవకాశం ఉందో, ప్రకటన చేయక పోవడానికీ అంతే అవకాసముంది. ఈ సభను అర్థాంతరంగా పెడుతున్నందున భారీగా కాకుండా మినీ బహిరంగ సభలా చేస్తారు.