అధిష్టానం రాక్షస క్రీడకు తెరలేపింది: అంబటి రాంబాబు

హైదరాబాద్: మంత్రి పదవులు రానివారిని ప్రోత్సహించాలనే దురుద్దేశ్యం దివంగత ముఖ్యమంత్రి తనయుడు వైయస్ జగన్మోహన్ రెడ్డికి లేదని ఆయన అనుచరుడు అంబటి రాంబాబు మంగళవారం ఓ టీవీ ఛానల్ కు ఇచ్చిన ఇంటర్య్యూలో అన్నారు. వైయస్ మరణానంతరం కుటుంబాన్ని చీల్చే రాక్షస క్రీడకు కాంగ్రెసు హైకమాండ్ తెరలేపింది ఆయన దుయ్యబట్టారు. వైయస్ అవినీతి చిట్టా తన వద్ద ఉందని చెప్పిన డిఎల్ రవీంద్రారెడ్డికి మంత్రి పదవి కట్టబెట్టారన్నారు.

జగన్ కు దగ్గరగా ఉన్నవారికి కొందరికి మంత్రి పదవులు కట్టబెట్టి జగన్ కు దూరం చేయాలని, జగన్ ను ఇబ్బంది పెట్టాలని ముఖ్యమంత్రి కిరణ్ కుమార్ రెడ్డి, అధిష్టానం ప్రయత్నాలు చేశారని అన్నారు. ప్రభుత్వాన్ని పడగొట్టాలనే ఉద్దేశ్యం ఏమాత్రం జగన్ కు లేదన్నారు. కడప, పులివెందుల ఉప ఎన్నికలపై కుట్ర పన్నుతున్న నేతలను ప్రజలను గమనిస్తున్నారని, వారి కుట్రలు స్పష్టమైన సందేశాన్ని ఇస్తున్నాయన్నారు.