కొండను తవ్వి తొండను కూడా బయటకు తీయని కిరణ్: రేవంత్ రెడ్డి

హైదరాబాద్: ముఖ్యమంత్రి కిరణ్ కుమార్ రెడ్డి తన కేబినెట్ కూర్పు కోసం చేసిన ప్రయత్నాలు కొండను తవ్వి ఎలుకను పడతాడని అనుకుంటే తొండను కూడా పట్టినట్టు కనిపించడం తెలుగుదేశం పార్టీ నాయకుడు రేవంత్ రెడ్డి మంగళవారం ఎద్దేవా చేశారు. మంత్రివర్గ కూర్పుపై తెలుగుదేశం పార్టీ నేతలు దేవేందర్ గౌడ్, రేవంత్ రెడ్డి, యనమల రామకృష్ణుడు ధ్వజమెత్తారు. మంత్రివర్గంలోని కొత్తమంత్రులందరిపై అవినీతి ఆరోపణలు ఉన్నాయన్నారు. కిరణ్ కుమార్ రెడ్డి అవినీతిపరులను ఏరికోరి ఎన్నుకున్నట్లుగా కనిపిస్తుందన్నారు.

కళంకితులకే మంత్రి పదవులు సిఎం అప్పజెప్పారని యనమల రామకృష్ణుడు అన్నారు. మంత్రివర్గ కూర్పు చూస్తుంటే అవినీతిని కొనసాగిస్తామని చెప్పినట్టుగా కనిపిస్తుందన్నారు. ఎస్సీలకు తీవ్ర అన్యాయం జరిగిందన్నారు. క్యాబినెట్ వ్యవహారం చిన్న వ్యవహారం కాదని మరో నేత దేవేందర్ గౌడ్ అన్నారు. కాంగ్రెస్ పార్టీ ఆలోచన విధానం, ధోరణి ప్రజల పట్ల ఎంత దురాగతంగా ఉందో ఈ క్యాబినెట్ ద్వారా తెలుస్తుందన్నారు. ప్రజా సమస్యలపై ప్రభుత్వాన్ని నిలదీస్తామని దేవేందర్ గౌడ్ అన్నారు. మంత్రివర్గ కూర్పూలో సామాజిక న్యాయం ఏమాత్రం కల్పించలేదని ఆయన అన్నారు. కొత్తసీసాలో పాత సారా పోసినట్లు మంత్రివర్గ కూర్పు ఉందన్నారు.