కిరణ్ కుమార్ రెడ్డి మంత్రివర్గంపై ఎగిసి పడుతున్న అసంతృప్తి జ్వాలలు

హైదరాబాద్: ముఖ్యమంత్రి కిరణ్ కుమార్ రెడ్డి మంత్రి వర్గం కూర్పు పట్ల కాంగ్రెసు శాసనసభ్యుల్లో అసంతృప్తి జ్వాలలు రగులుతున్నాయి. మంత్రి పదవులు దక్కని సీనియర్లే కాకుండా జూనియర్లు కూడా తీవ్ర అసంతృప్తి వ్యక్తం చేస్తున్నారు. ముఖ్యమంత్రి కిరణ్ కుమార్ రెడ్డి మంత్రివర్గంలో రంగారెడ్డి జిల్లానుండి కేవలం సబితారెడ్డి ఒక్కరికే మంత్రిపదవి ఇవ్వడం ఆ జిల్లా కాంగ్రెస్ శాసనసభ్యులు రహస్య సమావేశం నిర్వహించారు. సబితారెడ్డి కన్నా సీనియర్లు జిల్లానుండి ఉన్నప్పటికీ, అందులోనూ జిల్లానుండి 8మంది శాసనసభ్యులు ఉన్నప్పటికీ మంత్రివర్గంలో సబితారెడ్డిని మినహా మరెవ్వరినీ తీసుకోక పోవటంపై మిగిలిన 7గురు శాసనసభ్యులు తీవ్రంగా మనస్తాపం చెందినట్లు సమాచారం.

కాగా కర్నూలు పాణ్యం శాననసభ్యుడు కాటసాని రాంభూపాలరెడ్డి ముఖ్యమంత్రి కిరణ్ తనకు మంత్రివర్గంలో స్థానం కేటాయించకపోవడానికి ఖచ్చితంగా కారణం చెప్పాలన్నారు. తాను 5 సార్లు జిల్లానుండి ఎక్కువ సార్లు గెలిచిన సీనియర్ నాయకుడిగా ఉన్నానని చెప్పారు. అనంతపురంనుండి జేసి దివాకర్ రెడ్డి కూడా తీవ్ర నిరాశతో ఉన్నారు. అయితే తాను కాంగ్రెస్ పార్టీని వీడేది లేదన్నారు. కాంగ్రెస్ ఉంటానని చెప్పటమే నా బలహీనతగా కిరణ్ గుర్తించారన్నారు. మంత్రివర్గం అధిష్టానం ప్రకారం కాకుండా కిరణ్ ముద్ర ఉన్నదన్నారు. గాదె వెంకటరెడ్డి సైతం తీవ్ర అసంతృప్తితో ఉన్నారు. తన అనుభవాన్ని పరిగణలోకి తీసుకోలేదన్నారు. తెలంగాణకు ఉప ముఖ్యమంత్రి పదవి ఇస్తామని మాట తప్పారని రాంరెడ్డి దామోదరరెడ్డి ఆవేదన వ్యక్తం చేశారు.