వైయస్ జగన్ తెలంగాణకు జైకొడ్తారా, సురేఖ మాటలు నమ్మొచ్చా?

హైదరాబాద్‌: కాంగ్రెసు పార్టీ నుంచి వైదొలగిన వైయస్ జగన్ తెలంగాణకు జైకొడ్తారా, తాము జైకొట్టిపిస్తామని శాసనసభ్యురాలు కొండా సురేఖ అంటున్నారు. వైయస్ జగన్ కొత్త పార్టీ పెట్టిన తర్వాత అవసరమైన పక్షంలో జగన్‌చే "జై తెలంగాణ" అనిపిస్తామని మాజీ మంత్రి కొండా సురేఖ అన్నారు. జగన్ వర్గాన్ని విస్మరిస్తే భవిష్యత్తులో పరిణామాలు ఎలా ఉంటాయో త్వరలో తెలుస్తుందని ఆమె హెచ్చరించారు. కొత్తగా కొలువుదీరిన మంత్రివర్గంపై జగన్ వర్గీయురాలు కొండా సురేఖ అసంతృప్తి వ్యక్తం చేశారు.

ముఖ్యమంత్రి కిరణ్ కుమార్ రెడ్డి మంత్రివర్గంలో రెడ్డి కులానికే అధిక ప్రాధాన్యత ఇచ్చారని కొండా సురేఖ ఆరోపించారు. తెలంగాణ కోసం పాటుపడుతామన్న మంత్రులందరూ డిసెంబర్ 31 తర్వాత ఏం జరుగుతుందో ప్రజలకు చెప్పాలని సురేఖ డిమాండ్ చేశారు. తెలంగాణ ఉద్యమంలో పాల్గొన్న విద్యార్థులపై కేసులు ఎత్తివేయకపోతే మంత్రుల ఇళ్లను ముట్టడిస్తామని ఆమె తెలిపారు.