ప్రణబ్ ను ప్రధాని అంటూ ఢిల్లీలో వెలిసిన హైదరాబాదు పోస్టర్లు

న్యూఢిల్లీ: కాంగ్రెసులో ప్రధానమంత్రి మన్మోహన్ సింగ్ వారసుడు ఎవరు అని ఏ చిన్నపాటి రాజకీయ పరిజ్ఞానం ఉన్నవారినైనా అడిగితే రాహుల్ గాంధీ అని టక్కున సమాధానం చెబుతారు. కాని న్యూఢిల్లీలో వెలిసిన కొన్ని పోస్టర్లు మన్మోహన్ వారసుడు రాహుల్ గాంధీ కాదని, ప్రణబ్ ముఖర్జీ అని అంటున్నాయి. పార్లమెంటు సమావేశాలకు వెళ్లే దారిలో గోడలకు మన్మోహన్ తర్వాత ప్రధానమంత్రిగా ప్రణబ్ ముఖర్జీని చేయాలని పోస్టర్లు వెలిశాయి. కాంగ్రెసుసెక్యులర్ హిందూ ఫోరం పేరుతో ఈ పోస్టర్లు వెలిశాయి.

ప్రణబ్ నే ప్రధానిగా ప్రతి సామాన్యుడి మనసులోని మాట అని ఆ పోస్టర్లలో పేర్కొన్నారు. చివరలో కాంగ్రెసును రక్షించాలి, హిందూస్థాన్ రక్షించాలి అని, జై కాంగ్రెస్, జై హిందూస్థాన్ అని నినాదాలు ఉన్నాయి. అయితే దేశ రాజధానిలో వెలిసిన పోస్టర్లు ఢిల్లీలో ప్రింటయినవి కాకుండా మన రాష్ట్ర రాజధాని హైదరాబాదులో ప్రింటయినట్లు సమాచారం. పోస్టర్లు హైదరాబాద్ సెంట్రల్ కమిటీ పేరుతో ఉన్నట్టు తెలుస్తోంది. దీంతో రాష్ట్రానికి సంబంధించిన వారే ఈ చర్యలకు పాల్పడి ఉంటారని అనుమానాలు వ్యక్తమవుతున్నాయి.