వైయస్ జగన్ వర్గీయులకు కిరణ్ కుమార్ రెడ్డి మొండిచేయి

హైదరాబాద్‌: ఊహించినట్లుగానే వైయస్ జగన్ వర్గానికి చెందినవారికి ముఖ్యమంత్రి కిరణ్ కుమార్ రెడ్డి మంత్రివర్గంలో చోటు లభించలేదు. పిల్లి సుభాష్ చంద్రబోస్, బాలినేని శ్రీనివాస రెడ్డిలకు మంత్రి పదవులు దక్కలేదు. వారితో పాటు తాజా మంత్రులు గాదె వెంటరెడ్డికి, శిల్పామోహన్ రెడ్డికి, పెద్దిరెడ్డి రామచంద్రారెడ్డికి మంత్రి పదవులు దక్కలేదు. గుంటూరు జిల్లాకు చెందిన గాదె వెంకటరెడ్డికి వియ్యంకుడు డిఎల్ రవీంద్రారెడ్డికి మంత్రి పదవి ఇవ్వడం వల్ల చోటు లభించలేదని అంటున్నారు. శిల్పా మోహన్ రెడ్డి, పెద్దిరెడ్డి రామచంద్రారెడ్డిలకు సామాజిక నేపథ్యం కారణంగానే పదవులు దక్కలేదని అంటున్నారు. తెలంగాణకు అత్యధికంగా16 మంత్రి పదవులు దక్కాయి. రాయలసీమకు 8, కోస్తాకు 15 మందికి మంత్రివర్గంలో చోటు దక్కింది.

కాగా, పది జిల్లాల నుంచి ఒక్కరేసికి మంత్రి పదవులు దక్కాయి. ఆదిలాబాద్ జిల్లాకు ప్రాతినిధ్యం లభించలేదు. హైదరాబాద్, కడప, మెదక్ జిల్లాల నుంచి ముగ్గురేసి మంది మంత్రివర్గంలో చేరారు. గుంటూరు జిల్లాకు అత్యధికంగా నలుగురికి మంత్రి పదవులు దక్కాయి. మంత్రివర్గ కూర్పులో కిరణ్ కుమార్ రెడ్డి అవకాశం ఉన్న మేరకు తనదైన ముద్రను చూపారు. డిప్యూటీ ఉప ముఖ్యమంత్రి పదవులు ఇంకా ఖరారు కాలేదని తెలుస్తోంది. పిసిసి అధ్యక్ష పదవి కూడా ఖరారు కాలేదు.