రంగంలోకి దిగిన అహ్మద్ పటేల్: అసంతృప్త మంత్రులకు ఫోన్లు

హైదరాబాద్‌: మంత్రుల్లో అసంతృప్త జ్వాలలు పెలుబుకుతున్న స్థితిలో కాంగ్రెసు పార్టీ అధిష్టానం రంగంలోకి దిగింది. అసంతృప్తి జ్వాలలను తగ్గించడానికి ప్రయత్నాలు ప్రారంభించింది. కాంగ్రెసు అధ్యక్షురాలు సోనియా గాంధీ రాజకీయ సలహాదారు అహ్మద్ పటేల్ అసంతృప్త మంత్రులకు ఫోన్లు చేస్తున్నారు. బొత్స సత్యనారాయణకు, వట్టి వసంత కుమార్ కు ఆయన ఫోన్లు చేశారు. తొందరపడి ప్రకటనలు చేయవద్దని ఆయన వారిని కోరారు. తొందరపడి ఎలాంటి నిర్ణయాలూ తీసుకోవద్దని ఆయన వారికి సూచించారు.

కాగా, మంత్రి పదవికి, శాసనసభ సభ్యత్వానికి రాజీనామా చేసిన వట్టి వసంత కుమార్ తన అనుచరులతో సమావేశమవుతున్నారు. మరోవైపు, అసంతృప్తికి గురైన మంత్రులతో సీనియర్ మంత్రి బొత్స సత్యనారాయణ నేతృత్వంలో సమావేశమవుతున్నారు. శాఖల కేటాయింపులో జరిగిన అన్యాయంపై పార్టీ అధిష్టానం దృష్టికి తీసుకెళ్లే ఆలోచనలో వీరు ఉన్నట్లు తెలుస్తోంది. వారంతా కలిసి ఢిల్లీ వెళ్లే ఆలోచనలో ఉన్నారు.