సరిదిద్దుతామని ముఖ్యమంత్రి హామీ ఇచ్చారు: బొత్స సత్యనారాయణ

హైదరాబాద్‌: శాఖల కేటాయింపులో జరిగిన అన్యాయాన్ని సరిదిద్దుతామని ముఖ్యమంత్రి ఎన్ కిరణ్ కుమార్ రెడ్డి హామీ ఇచ్చినట్లు మంత్రి బొత్స సత్యనారాయణ చెప్పారు. మంత్రివర్గంలోని లోటుపాట్లను తమ కాంగ్రెసు పార్టీ అధిష్టానం చక్కదిద్దుతుందనే నమ్మకం తనకు ఉందని ఆయన చెప్పారు. మంత్రివర్గ సమావేశం తర్వాత ఆయన గురువారం మీడియా ప్రతినిధులతో చెప్పారు. పార్టీ అధిష్టానం బిసిలకు న్యాయం చేస్తుందనే నమ్మకం ఉందని ఆయన చెప్పారు. కాగా, మంత్రివర్గంలో అసంతృప్తి లేదని మరో మంత్రి దానం నాగేందర్ చెప్పారు. తాము ఆశించిన మార్పులు జరుగుతాయని ఆయన అన్నారు.

మంత్రివర్గంలో అసమ్మతిపై, తెలంగాణకు ఉప ముఖ్యమంత్రి పదవిపై పార్టీ అధిష్టానం నిర్ణయం తీసుకుంటుందని ముఖ్యమంత్రి కిరణ్ కుమార్ రెడ్డి చెప్పారు. మంత్రుల శాఖల్లో మార్పులు చేర్పులపై కూడా అధిష్టానం చూసుకుంటుందని ఆయన చెప్పారు. మంత్రివర్గంలో వాడివేడిగానే చర్చ జరిగినట్లు తెలుస్తోంది. మంత్రివర్గంలోని విషయాలను బయటకు వెల్లడించకూడదనే వరకు మంత్రలకు, ముఖ్యమంత్రికి మధ్య ఒప్పందం కుదిరినట్లు తెలుస్తోంది.