కిరణ్ క్యాబినెట్లో చిచ్చు: వట్టి రాజీనామా, పది మందిలో అసంతృప్తి

హైదరాబాద్‌: ముఖ్యమంత్రి కిరణ్ కుమార్ రెడ్డి మంత్రివర్గంలో చిచ్చు రేగింది. శాఖల కేటాయింపులో తమకు అన్యాయం జరిగిందంటూ దాదాపు పది మంది మంత్రులు తీవ్ర అసంతృప్తితో ఉన్నారు. వట్టి వసంత్ కుమార్ ఏకంగా తమ మంత్రి పదవికి, శాసనసభ సభ్యత్వానికి రాజీనామా చేశారు. తన రాజీనామా లేఖను ఆయన నేరుగా స్పీకర్ కు పంపించారు. వట్టి వసంత కుమార్ ను బుజ్జగించడానికి ముఖ్యమంత్రి తరఫున ఆర్థిక శాఖ మంత్రి ఆనం రామనారాయణ రెడ్డి రంగంలోకి దిగారు. అయినా వట్టి వసంతకుమార్ దిగిరాలేదు. దాదాపు పది మంది మంత్రులు అసంతృప్తితో వేగిపోతున్నారు. అసంతృప్తికి గురైన మంత్రులు బుధవారం రాత్రి సమావేశమయ్యారు. బొత్స సత్యనారాయణ ఏకంగా ముఖ్యమంత్రి కిరణ్ కుమార్ రెడ్డికి ఫోన్ చేసి తన అసంతృప్తిని వ్యక్తం చేశారు. ప్రభుత్వమంటే ప్రైవేట్ లిమిటెడ్ కంపెనీ కాదని బొత్స వ్యాఖ్యానించినట్లు సమాచారం.

బొత్స సత్యనారాయణతో పాటు కాసు వెంకటకృష్ణా రెడ్డి, ధర్మాన ప్రసాద రావు, పొన్నాల లక్ష్మయ్య, దానం నాగేందర్, ముఖేష్, కోమటి రెడ్డి వెంకటరెడ్డి, కన్నా లక్ష్మినారాయణ వంటి మంత్రులు అసంతృప్తితో ఉన్నారు. ముఖ్యమైన పది శాఖల్లో ఏడు శాఖలు ఒకే సామాజిక వర్గానికి దక్కాయని ఎస్సీ మంత్రులు విమర్సిస్తున్నారు. అసమ్మతి మంత్రులకు బొత్స సత్యనారాయణ నాయకత్వం వహిస్తున్నారు. తమ తదుపరి కార్యక్రమం ఖరారు చేసుకునే ఆలోచనలో ఉన్నారు. కోమటి రెడ్డి వెంకటరెడ్డి తన మంత్రి పదవి రాజీనామా చేసినట్లు తెలుస్తోంది.