హైకమాండ్ కు షరతులు పెట్టిన అసంతృప్త మంత్రులు

హైదరాబాద్‌: రాజీ యత్నాలకు రంగంలోకి దిగిన కాంగ్రెసు పార్టీ అధిష్టానానికి అసమ్మతి మంత్రులు షరతులు పెట్టారు. తమకు ప్రాధాన్యం లేని శాఖలు కేటాయించారంటూ దాదాపు పది మంది మంత్రులు తీవ్ర అసంతృప్తితో రగిలిపోతున్న విషయం తెలిసిందే. వట్టి వసంత కుమార్ ఇప్పటికే మంత్రి పదవికి, శాసనసభ సభ్యత్వానికి రాజీనామా చేశారు. మిగతా అసంతృప్త మంత్రులు బొత్స సత్యనారాయణ నేతృత్వంలో సమావేశం కావాలని నిర్ణయించుకున్నారు. ఈ నేపథ్యంలో కాంగ్రెసు అధిష్టానం రంగంలోకి దిగి అసంతృప్తులను బుజ్జగించే ప్రయత్నం చేస్తోంది. ఈ స్థితిలో అధిష్టానానికి వారు కొన్ని షరతులు పెట్టారు.

ముఖ్యమంత్రి కిరణ్ కుమార్ రెడ్డి అనుసరించిన తీరును సరి చేయడానికి ప్రత్యేక దూతను హైదరాబాదు పంపించాలని అసంతృప్త మంత్రులు పార్టీ అధిష్టానాన్ని కోరారు. పరిస్థితి ఇలాగే కొనసాగితే వైయస్ జగన్ దీన్ని ఉపయోగించుకునే అవకాశం ఉందని, దాన్ని నివారించడానికి ముందుకు రావాలని వారు అధిష్టానానికి సూచించారు. కాగా, మంత్రి ధర్మాన ప్రసాదరావు నివాసంలో అసంతృప్త మంత్రులు సమావేశమయ్యారు. మంత్రి రాంరెడ్డి వెంకటరెడ్డి ముఖ్యమంత్రి కిరణ్ కు కలిసి తన అసంతృప్తిని వ్యక్తం చేశారు. ఆయనను బుజ్జగించేందుకు కిరణ్ కుమార్ రెడ్డి ప్రయత్నించారు.