వైయస్ జగన్ కు కిరణ్ కుమార్ రెడ్డి మంత్రుల అసమ్మతి లాభిస్తుందా?

హైదరాబాద్: ముఖ్యమంత్రి కిరణ్ కుమార్ రెడ్డి మంత్రివర్గంలో నెలకొన్న అసమ్మతి వైయస్ జగన్ కు లాభిస్తుందా అనే ప్రశ్న ఉదయిస్తోంది. ఈ అసమ్మతిని తనకు అనుకూలంగా మలుచుకోవపడానికి ఆయన ప్రయత్నించినట్లు గురువారం ఉదయం వార్తలు వచ్చాయి. తీవ్ర అసమ్మతికి గురైన వట్టి వసంత కుమార్ కు వైయస్ జగన్ ఫోన్ చేసినట్లు తెలుస్తోంది. అయితే, ఆయన కూడా వైయస్ జగన్ వైపు వెళ్లే స్థితిలో లేరని తెలుస్తోంది. తాను కాంగ్రెసుతోనే ఉంటానని ఆయన గురువారం సాయంత్రం మీడియాకు విడుదల చేసిన ఓ లేఖలో స్పష్టం చేశారు. జగన్ వైపు వెళ్తే అవకాశాలున్నట్లు తనపై వార్తలు వస్తాయనే ముందు జాగ్రత్తతోనే ఆయన ఈ లేఖను విడుదల చేసినట్లు తెలుస్తోంది.

అసంతృప్తి వ్యక్తం చేస్తున్న మంత్రులు ఎవరు కూడా వైయస్ జగన్ తో వెళ్లే అవకాశాలు లేనట్లు తెలుస్తోంది. మంత్రి కోమటి రెడ్డి వెంకట రెడ్డి ఇటీవలి వరకు వైయస్ జగన్ కు కొంత అనుకూలంగా ఉన్నట్లు కనిపించారు. కానీ, ఆయన మనసు మార్చుకున్నట్లు సమాచారం. గతంలో జగన్ కు అనుకూలంగా ఉన్న దానం నాగేందర్ వంటివారు కూడా ఆయనతో వెళ్లడానికి సిద్ధంగా లేరు. కాంగ్రెసులోనే ఉంటే చాలా మంది వైయస్ జగన్ కు అనుకూలంగా వ్యవహరించేందుకు సిద్ధంగా ఉన్నారు. జగన్ పార్టీ నుంచి వెళ్లిపోవడంతో ఆయన వెంట వెళ్లడానికి సిద్ధంగా లేనట్లు తెలుస్తోంది. బొత్స సత్యనారాయణ, పొన్నాల లక్ష్మయ్య, ధర్మాన ప్రసాదరావు వంటి సీనియర్ మంత్రులు ఎవరు కూడా వైయస్ జగన్ వెంట వెళ్లే అవకాశాలు లేవని అంటున్నారు. కేవలం ప్రాధాన్యం లేని శాఖలు కేటాయించి అవమానించారనే ఆగ్రహంతోనే వారు ఉన్నారు తప్ప పార్టీ నుంచి వెళ్లిపోవాలనే ఉద్దేశంతో వారు లేరు.