ఇన్ఫార్మర్ నెపంతో టిడిపి కార్యదర్శిని హత్య చేసిన నక్సలైట్లు

వరంగల్: వరంగల్ జిల్లాలో నక్సలైట్లు తెలుగుదేశం పార్టీకి చెందిన వ్యక్తిని హత్య చేసిన దారుణ సంఘటన చోటు చేసుకుంది. గత కొంతకాలంగా వరంగల్ జిల్లాలో నక్సలైట్ల ఉనికి లేదు. అయితే తమ ఉనికి క్రమంగా జిల్లాలో కోల్పోతుండటంతో వారు తమ ఉనికి చాటుకోవడానికి బుధవారం రాత్రి ఏటూరునాగారంలోని లక్ష్మీపురం గ్రామానికి చెందిన తెలుగుదేశం పార్టీ గ్రామ కార్యదర్శి మజీద్ ను ఇన్ఫార్మర్ నెపంతో కిడ్నాప్ చేశారు. మజీద్ తో పాటు మరో నలుగురిని కూడా నక్సలైట్లు కిడ్నాప్ చేశారు.

అయితే గురువారం మధ్యాహ్నం మజీద్ మృతదేహాన్ని పోలీసులు లక్ష్మీపురం గ్రామ శివారులో కనుగొన్నారు. మిగిలిన వారిని నక్సలైట్లు విడిచిపెట్టనట్టు సమాచారం. మజీద్ హత్యతో గ్రామంలో విషాదఛాయలు అలుముకున్నాయి. అయితే కేవలం తమ ఉనికి చాటుకోవడానికి ఇన్ఫార్మర్ల నెపంతో తీసుకు వెళ్లి మజీద్ ను హత్య చేశారని అంటున్నారు.