డిసెంబర్ 31వ తేదీ తర్వాతనే వైయస్ జగన్ కొత్త పార్టీ

హైదరాబాద్‌: కాంగ్రెసు పార్టీకి రాజీనామా చేసిన వైయస్ జగన్ డిసెంబర్ 31వ తేదీ తర్వాతనే తన ప్రాంతీయ పార్టీని ప్రకటించే అవకాశాలున్నాయి. వైయస్ జగన్ వర్గానికి చెందిన శాసనసభ్యురాలు కొండా సురేఖ మాటలు ఈ విషయాన్ని తెలియజేస్తున్నాయి. డిసెంబర్ 31వ తేదీ తర్వాత వైయస్ జగన్ పార్టీ ప్రకటించే అవకాశాలున్నాయని ఆమె చెప్పారు. పార్టీ పెట్టాలనే వైయస్ జగన్ నిర్ణయాన్ని స్వాగతిస్తున్నట్లు తెలుస్తోంది. డిసెంబర్ 31వ తేదీన శ్రీకృష్ణ కమిటీ నివేదిక సమర్పించిన తర్వాత తెలంగాణపై ఓ స్పష్టత వస్తుందని, ఆ స్పష్టత వచ్చిన తర్వాతనే పార్టీ పెట్టడం మంచిదని వైయస్ జగన్ భావిస్తున్నారు.

శ్రీకృష్ణ కమిటీ నివేదిక తెలంగాణకు అనుకూలంగా ఉంటుందా, వ్యతిరేకంగా ఉంటుందా అనేది తేలితే పార్టీ విధివిధానాలను ఖరారు చేసుకోవడం సులభమవుతుందని వైయస్ జగన్ అనుకుంటున్నట్లు తెలుస్తోంది. డిసెంబర్ 21వ తేదీననే పార్టీని ప్రకటించాలని వైయస్ జగన్ తొలుత అనుకున్నప్పటికీ తెలంగాణ నాయకుల సూచన మేరకు మరింత కాలం ఆగేందుకు సిద్ధపడినట్లు తెలుస్తోంది. శ్రీకృష్ణ కమిటీ నివేదికను బట్టి పార్టీ విధివిధానాల్లో తెలంగాణ అంశాన్ని చేర్చడానికి తాము సూచనలు చేస్తామని కొండా సురేఖ ఓ ప్రైవేట్ తెలుగు టీవీ చానెల్ తో అన్నారు.