వైయస్ జగన్ వ్యవహారాలపై సోనియాతో డి శ్రీనివాస్ చర్చ

న్యూఢిల్లీ: వైయస్ జగన్ వ్యవహారాలపై ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ ఎఐసిసి అధ్యక్షురాలు సోనియా గాంధీతో చర్చించారు. రాష్ట్రంలోని తాజా రాజకీయ పరిణామాలపై ఆయన సోనియాతో విస్తృతంగా మాట్లాడారు. ఈ సమయంలో సోనియా రాజకీయ సలహాదారు అహ్మద్ పటేల్ కూడా ఉన్నారు. వైయస్ జగన్ వెంట వెళ్తున్నదెవరు, కాంగ్రెసులోనే ఉంటూ వైయస్ జగన్ కు మద్దతిస్తున్నదెవరు అనే అంశంపై కూడా సోనియా డిఎస్ ను అడిగి తెలుసుకున్నట్లు సమాచారం. అదే సమయంలో పిసిసి అధ్యక్షుడి మార్పు, శానససభా స్పీకర్, చీఫ్ విప్, ఉప ముఖ్యమంత్రి పదవులపై కూడా ఆయన సోనియాతో మాట్లాడారు.

పిసిసి అధ్యక్షుడిగా తనను మార్చే పక్షంలో ఎఐసిసిలో తనకు స్థానం కావాలని డిఎస్ సోనియాను కోరినట్లు సమాచారం. ఇప్పటికిప్పుడైతే స్పీకర్, చీఫ్ విప్ ల పదవులను తేల్చాల్సిన అవసరం మాత్రం ఉంది. డిప్యూటీ సిఎం, స్పీకర్, చీఫ్ విప్ ల పదవుల కోసం రాష్ట్ర కాంగ్రెసు నేతలు ఢిల్లీలో పైరవీలు ప్రారంభించారు. సోనియాతో భేటీ తర్వాత డిఎస్ అహ్మద్ పటేల్ తో కలిసి ఆయన నివాసానికి వెళ్లారు.