పిసిసి రేసులో మర్రి శశిధర్ రెడ్డి, సోనియా గాంధీతో భేటీ

న్యూఢిల్లీ: దివంగత మాజీ ముఖ్యమంత్రి మర్రి చెన్నారెడ్డి కుమారుడు, శాసనసభ్యుడు మర్రి శశిధర్ రెడ్డి ప్రదేశ్ కాంగ్రెసు కమిటీ (పిసిసి) అధ్యక్ష పదవికి రేసులో ముందున్నారు. మర్రి శశిధర్ రెడ్డి కాంగ్రెసు అధ్యక్షురాలు సోనియా గాంధీతో సుదీర్ఘ చర్చలు జరిపారు. మర్రి శశిధర్ రెడ్డి ఉండగానే సోనియా గాంధీ కేంద్ర మంత్రి ఎస్ జైపాల్ రెడ్డిని పిలిపించారు. అంతకు ముందు పిసిసి అధ్యక్షుడు డి. శ్రీనివాస్ సోనియా గాంధీతో చర్చలు జరిపారు. అయితే, పదవులు ఎక్కువగా రెడ్లకే దక్కుతున్నాయని విమర్శలు వస్తున్న నేపథ్యంలో బిసికి గానీ ఎస్సీకి గానీ మైనారిటీకి గానీ పిసిసి అధ్యక్ష పదవి ఇస్తారా అనేది ఉత్కంఠగానే ఉంది. పొన్నాల లక్ష్మయ్య, షబ్బీర్ అలీ, మల్లు భట్టి విక్రమార్క, నంది ఎల్లయ్య పిసిసి పదవికి రేసులో ఉన్నారు.

సోనియాతో భేటీ తర్వాత డి. శ్రీనివాస్ అహ్మద్ పటేల్ తో సమావేశమయ్యారు. ఉప ముఖ్యమంత్రి పదవి, శాసనసభా స్పీకర్, చీఫ్ విప్ పదవులపై కూడా సోనియా గాంధీ దృష్టి పెట్టారు. సామాజిక వర్గాలను, ప్రాంతీయ అంశాలను పరిగణనలోకి తీసుకుని ఈ పదవులకు నాయకులను ఎంపిక చేసే అవకాశం ఉంది.