తెలంగాణకై ఢిల్లీలో జంతర్ మంతర్ వద్ద భాజపా సత్యాగ్రహ, లాఠీఛార్జి

న్యూఢిల్లీ: ప్రత్యేక తెలంగాణ కోరుతూ భారతీయ జనతా పార్టీ న్యూఢిల్లీలో చేపట్టిన సత్యాగ్రహ కార్యక్రమం ఉద్రిక్తంగా మారింది. న్యూఢిల్లీలోని జంతర్ మంతర్ వద్ద భాజపా ఆధ్వర్యంలో తెలంగాణ కోరుతూ భారీ ఎత్తున ఆందోళన నిర్వహించారు. తెలంగాణ పాటలు పాడారు. తెలంగాణకు అనుకూలంగా నినాదాలు చేశారు. పార్లమెంటులో తెలంగాణకు అనుకూలంగా బిల్లు ప్రవేశ పెట్టాలని కోరారు. ఆ బిల్లు భాజపా మద్దతు ఇస్తుందన్నారు. అనంతరం వారు పార్లమెంటు వైపు వెళ్లేందుకు సమాయత్తమయ్యారు. అయితే పోలీసులు వారిని అడ్డుకున్నారు.

ఈ నేపథ్యంలో పోలీసులకు, భాజపాకు మధ్య తోపులాట జరిగింది. పోలీసులు స్వల్ప లాఠీఛార్జ్ చేశారు. తెలంగాణ, సీమాంధ్ర అభివృద్ధి చెందాలంటే రాష్ట్రాన్ని విభజించాలని డిమాండు ఈ సందర్భంగా భాజపా డిమాండు చేసింది. దివంగత ప్రధాని నెహ్రూ సైతం విడిపోవాలనుకున్నప్పుడు విడిపోవాలని చెప్పారని వారు అన్నారు. గత డిసెంబరులో చిదంబరం తెలంగాణ ప్రక్రియ ప్రారంభిస్తున్నట్టు ప్రకటన చేశారని, దానికి కట్టుబడి ఉండాలని వారు డిమాండు చేశారు. శ్రీకృష్ణ కమిటి నివేదిక తెలంగాణకు అనుకూలంగా ఉంటుందనే ఆశాభావం వారు వ్యక్తం చేశారు. అయితే నివేదిక ఎలా ఉన్నా తెలంగాణ రాష్ట్రం ఇవ్వాల్సిందేనని వారు డిమాండ్ చేశారు.