మాకినేని పెద రత్తయ్యకు గాలం వేసిన వైయస్ జగన్ క్యాంప్

గుంటూరు: గుంటూరు జిల్లా తెలుగుదేశం సీనియర్ నేత, మాజీ మంత్రి మాకినేని పెద రత్తయ్యకు జగన్ వర్గీయులు గాలం వేసినట్టు తెలుస్తోంది. తగిన ప్రాధాన్యం లేదంటూ, పార్టీకి గుడ్‌బై చెప్పేందుకు రత్తయ్య సిద్ధమవుతున్నట్టు జిల్లాలో కొంతకాలంగా ప్రచారం జరుగుతోంది. అంకిత భావంతో పనిచేసేవారికి తెలుగుదేశం పార్టీలో గుర్తింపు లేదని ఆయన బహిరంగంగానే వ్యాఖ్యానించారు. ప్రత్తిపాడు నియోజకవర్గం నుంచి రత్తయ్య వరుసగా ఐదు పర్యాయాలు గెలుపొందారు. అయితే, గత ఎన్నికల్లో ఆయనకు పోటీచేసే అవకాశం లభించలేదు. ప్రత్తిపాడు నియోజకవర్గం ఎస్సీలకు రిజర్వ్ కావడంతో పార్టీ ఆయన స్థానంలో వేరొకరిని నిలపాల్సి వచ్చింది. అప్పటి నుంచి రత్తయ్య రాజ్యసభ సీటు కోసం ప్రయత్నాలు చేశారు. ఆ సీటును సుజనా చౌదరి చేజిక్కించుకోవడంతో ఆయన మరింత ఆగ్రహంతో ఉన్నారు.

అప్పటి నుంచి పార్టీ కార్యక్రమాలకు దూరంగా ఉంటున్నారు. ఈ పరిస్థితిని అనుకూలంగా మార్చుకునేందుకు జగన్ వర్గం నేతలు రంగంలోకి దిగారు. హైదరాబాద్ నుంచి జగన్ వర్గానికి చెందిన ఇద్దరు కీలక నేతలు బుధవారం రత్తయ్యకు ఫోన్ చేసి జగన్ పెట్టబోయే పార్టీలోకి ఆహ్వానించినట్టు సమాచారం. ఫోన్‌లో మంతనాలు జరిపినవారిలో జగన్ దగ్గర బంధువు కూడా ఉన్నట్లు తెలిసింది. ఆ తర్వాత జిల్లాలో తనకు అత్యంత సన్నిహితులని భావించిన నేతల్లో అందుబాటులో ఉన్నవారిని పిలిపించుకొని రత్తయ్య సమాలోచనలు జరిపినట్టు సమాచారం.