ప్రాణం ఉన్నంత వరకు వైయస్ జగన్ వెంటే ఉంటా: కొండా సురేఖ

హైదరాబాద్‌: ప్రాణం ఉన్నంత వరకు తాను మాజీ పార్లమెంటు సభ్యుడు వైయస్ జగన్ వెంటే ఉంటానని కాంగ్రెసు శాసనసభ్యురాలు, మాజీ మంత్రి కొండా సురేఖ చెప్పారు. వైయస్సార్ కుటుంబం తనకు ఎంతో మేలు చేసిందని ఆమె శుక్రవారం మీడియా ప్రతినిధులతో అన్నారు. వైయస్ జగన్ పార్టీ పెట్టేంత వరకు తాను కాంగ్రెసులోనే ఉంటానని, పార్టీ పెట్టిన తర్వాత జగన్ పార్టీలో చేరే విషయంపై ఆలోచన చేస్తానని ఆమె అన్నారు. తాను కాంగ్రెసులోనే ఉంటూ పోరాటం చేస్తానని ఆమె చెప్పారు.

ఉద్యమాల సందర్భంగా విద్యార్థులపై పెట్టిన కేసులు ఎత్తేయాలని ఆమె ప్రభుత్వాన్ని డిమాండ్ చేశారు. వైయస్ జగన్ ఓదార్పు యాత్ర సందర్భంగా వరంగల్ జిల్లా మహబూబాబాద్ లో విద్యార్థులపై పెట్టిన కేసులను కూడా ఎత్తేయాలని ఆమె కోరారు. శ్రీకృష్ణ కమిటీ నివేదిక వచ్చిన తర్వాత వైయస్ జగన్ తెలంగాణపై తన వైఖరిని ప్రకటిస్తారని ఆమె చెప్పారు.