బంగారు లక్ష్మణ్ ఎపిసోడ్ ను మరిచారా: సోనియా గాంధీ ప్రశ్న

న్యూఢిల్లీ: 2జి స్పెక్ట్రమ్ కుంభకోణంపై సంయుక్త పార్లమెంటరీ కమిటీ వేయాలని డిమాండ్ చేస్తున్న బిజెపిపై కాంగ్రెసు అధ్యక్షురాలు సోనియా గాంధీ తీవ్రంగా ధ్వజమెత్తారు. బంగారు లక్ష్మణ్ ఉదంతాన్ని మరిచిపోయారా అని ఆమె అడిగారు. జెపిసి డిమాండ్ ను ఆమె తిరస్కరించారు. కాంగ్రెసు పార్లమెంటరీ పార్టీ (సిపిపి) సమావేశంలో ఆమె సోమవారం మాట్లాడారు. ఎన్డీఎ పాలనలో వచ్చిన అవినీతి ఆరోపణలను మరిచిపోయారా అంటూ బంగారు లక్ష్మణ్ డబ్బులు తీసుకుంటూ తెహెల్కాకు పట్టుబడిన ఉదంతాన్ని ఆమె గుర్తు చేశారు. కర్ణాటక ప్రభుత్వానిది ఆవినీతి పాలన అనే విషయాన్ని బిజెపి గుర్తుంచుకోవాలని ఆమె అన్నారు.

2జి స్పెక్ట్రమ్ కేటాయింపుల వ్యవహారంపై బిజెపి నాయకుడు ఎంఎం జోషీ నేతృత్వంలోని పార్లమెంటు పబ్లిక్ కమిటీ (పిఎసి) విచారణకు తాము సిద్ధంగా ఉన్నామని ఆమె చెప్పారు. తమ పార్టీ అవినీతిపై నిరంతర పోరాటం చేస్తోందని ఆమె చెప్పారు. అవినీతికి పాల్పడినట్లు ఆరోపణలు ఎదుర్కున్నవారి చేత రాజీనామా చేయించిన ఘనత తమ పార్టీదేనని ఆమె అన్నారు. బిజెపి తన చరిత్రను తిరిగి చూసుకోవాలని, పార్లమెంటు గౌరవాన్ని తగ్గించకూడదని ఆమె సూచించారు.