16న తెలంగాణ విద్యాసంస్థల బంద్: కె చంద్రశేఖర రావు పిలుపు

హైదరాబాద్‌: ఈ నెల 16వ తేదీన తెలంగాణలోని విద్యాసంస్థల బంద్ కు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు పిలుపునిచ్చారు. విద్యార్థులపై పెట్టిన కేసులను ఎత్తేయాలని డిమాండ్ చేసిన తమ పార్టీ శాసనసభ్యులను మార్షల్స్ తో శాసనసభ బయటకు గెంటివేయడాన్ని నిరసిస్తూ ఈ బంద్ పాటించాలని ఆయన మంగళవారం పిలుపునిచ్చారు. విద్యాసంస్థలను బహిష్కరించి వరంగల్ లో జరిగే తెలంగాణ మహాగర్జన సభకు హాజరు కావాలని ఆయన విద్యార్థులను కోరారు.

ఈ నెల 9వ తేదీన జరగాల్సిన తెలంగాణ మహాగర్జన సభను తెరాస వర్షం కారణంగా 16వ తేదీకి వాయిదా వేసిన విషయం తెలిసిందే. కెసిఆర్ మంగళవారం ఉదయం ఆదిలాబాద్ లోని అర్జునగుట్టలో సతీసమేతంగా ప్రాణహిత పుష్కరాల్లో పాల్గొన్నారు. ప్రాణహితలో స్నానం చేశారు. ప్రాణహిత పుష్కరాలకు సౌకర్యాలు సరిగా కల్పించలేదని ఆయన ప్రభుత్వంపై మండిపడ్డారు.