ఏ గుర్తుపై గెలిచామో గుర్తుంచుకోవాలి: జగన్ వర్గీయులపై పురంధేశ్వరి ఫైర్

విజయవాడ: మనం ఏ పార్టీనుండి పోటీ చేసి గెలిచామో గుర్తుంచుకోవాలని కేంద్రమంత్రి పురంధేశ్వరి బుధవారం పరోక్షంగా మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు జగన్ వైపు వెళుతున్న పార్లమెంటు సభ్యులను, శాసనసభ్యులను దృష్టిలో పెట్టుకొని వ్యాఖ్యానించారు. ఏ గుర్తుపై గెలిచామో దానిని మరిచిపోవటం సరికాదన్నారు. టిక్కెట్ ఇచ్చి గెలిచేందుకు కృషి చేసిన పార్టీని మరిచి పోకూడదన్నారు.

రాష్ట్రంలో రైతుల పరిస్థితి దారుణంగా ఉందన్నారు. వారి పరిస్థితిని ప్రధానమంత్రి మన్మోహన్ సింగ్ కు వివరించానన్నారు. ప్రధాని త్వరలోని రైతులను ఆదుకునేందుకు విధివిధానాలను ప్రకటించే అవకాశం ఉంది అని పురంధేశ్వరి చెప్పారు. రాష్ట్రంలోని రైతుల దుర్బర పరిస్థితి గురించి కేంద్రం ప్రత్యేక దృష్టి సారించిందన్నారు.