సీతమ్మదార వద్ద వైయస్ జగన్ నిరాహార దీక్ష: భూమి పూజ చేసిన అంబటి

విజయవాడ: మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు జగన్మోహన్ రెడ్డి ఈ నెల 21, 22 తేదిలలో 48 గంటల పాటు రైతులు, చేనేత కార్మికుల సమస్యకోసం చేయనున్న నిరాహార దీక్ష కోసం జగన్ అనుచరులు విజయవాడలో స్థలాన్ని ఖరారు చేశారు. కృష్ణానది తీరంలోని సీతమ్మ పాదాల వద్ద స్థలాన్ని ఎంపిక చేసినట్టు అంబటి రాంబాబు చెప్పారు. అంబటి రాంబాబు, తితిదే మాజీ చైర్మన్ భూమన కరుణాకర్ రెడ్డిలు అక్కడి స్థలాన్ని పరిశీలించారు. అనంతరం వారు అక్కడ భూమి పూజ చేశారు. భూమి పూజలో విజయవాడ నగర మాజీ మేయర్ తాడి శకుంతల, మాజీ శాసనసభ్యుడు జలీల్ ఖాన్ కూడా పాల్లొన్నారు.

బందరు సభలో వైయస్ జగన్మోహన్ రెడ్డి రైతులకు సమస్యలు పరిష్కరించకుంటే నిరాహార దీక్ష చేస్తానని హెచ్చరించిన విషయం తెలిసిందే. అప్పటినుండి స్థల పరిశీలన చేశారు. భారీ సంఖ్యలో జగన్ కు సంఘీభావం ప్రకటించే అవకాశం ఉన్నందున నాలుగైదు చోట్ల స్థలాలను పరిశీలించారు. జగన ప్రకటన ప్రకారం లక్ష మంది దీక్ష చేయడానికి అనువైన స్థలం కోసం వారు ఇక్కడ నాలుగైదు ప్రాంతాలను పరిశీలించారు. హైటెక్ సిటీ వద్ద, కృష్ణా నది వద్ద, తాడేపల్లి వద్ద కూడా వారు స్థలాలను పరిశీలించారు. అయితే చివరకు కృష్ణా పరివాహక సీతమ్మధారను ఎంపిక చేశారు.