2జి స్పెక్ట్రమ్ కేసును పర్యవేక్షించాలని సుప్రీంకోర్టు నిర్ణయం

న్యూఢిల్లీ: 2జి స్పెక్ట్రమ్ కుంభకోణం కేసు దర్యాప్తు విషయంలో సుప్రీంకోర్టు స్వయంగా రంగంలోకి దిగింది. కేసు దర్యాప్తును తాను స్వయంగా పర్యవేక్షించాలని నిర్ణయించుకుంది. ఈ నెల 9వ తేదీన ఓ స్వచ్ఛంద సంస్థ దాఖలు చేసిన ప్రజా ప్రయోజనాల వ్యాజ్యంపై సుప్రీంకోర్టు గురువారం ఈ మేరకు నిర్ణయం తీసుకుంది. 2జి స్పెక్ట్రమ్ కుంభకోణంపై సిబిఐ, ఎన్ ఫోర్స్ మెంట్ డైరెక్టరేట్ దర్యాప్తు చేస్తున్నాయి. 2001 నుంచి జారీ చేసిన టెలికం లైసెన్సుల జారీపై దర్యాప్తు జరపాలని కూడా సుప్రీంకోర్టు ఆదేశించింది. అప్పుడు బిజెపి నేతృత్వంలోని ఎన్డీఎ అధికారంలో ఉంది.

వచ్చే ఏడాది ఫిబ్రవరి 10వ తేదీలోగా దర్యాప్తుపై నివేదిక సమర్పించాలని సుప్రీంకోర్టు దర్యాప్తు సంస్థను ఆదేశించింది. 2జి స్పెక్ట్రమ్ కుంభకోణంపై టెలికం మంత్రిగా ఎ రాజా గత నెలలో రాజీనామా చేశారు. 2జి స్పెక్ట్రమ్ కేటాయింపుల్లో 1.76 లక్షల కోట్ల కుంభకోణం జరిగినట్లు ఆరోపణలు వచ్చాయి. సిబిఐ ఎవరి ప్రభావానికి లోను కాకూడదని సుప్రీంకోర్టు అభిప్రాయపడింది. తదుపరి విచారణను వచ్చే ఏడాది 11వ తేదీకి వాయిదా వేసింది.