డిజిపి అరవింద రావుపై మండిపడుతున్న తెలంగాణవాదులు

హైదరాబాద్: డిజిపి అరవిందరావు ప్రకటనపై తెలంగాణ రాష్ట్ర సమితి (తెరాస) నాయకులు, ప్రజా సంఘాల నాయకులు తీవ్రంగా మండిపడుతున్నారు. అరవింద రావు ముఖ్యమంత్రిగా ఫీలువుతున్నారని తెలంగాణ జెఎసి వ్యాఖ్యానిస్తోంది. అరవిందరావును ఆంధ్రారావుగా తెలంగాణవాదులు అభివర్ణించారు. అరవింద రావుపై తెరాస శాసనసభా పక్ష నేత ఈటెల రాజేందర్ తీవ్రంగా మండిపడ్డారు. తెలంగాణ రాష్ట్ర సాధనకు తాము దేనికైనా సిద్ధంగా ఉన్నామని ఆయన శనివారం మీడియా ప్రతినిధులతో అన్నారు. తెలంగాణ రాష్ట్ర ఆకాంక్షను ప్రజలు వ్యక్తం చేస్తున్నారని, ఆ ఆకాంక్షను నెరవేర్చుకోవడానికి ఎంతకైనా తెగిస్తామని ఆయన అన్నారు. ప్రాణత్యాగాలకైనా తాము సిద్ధపడుతామని, అరవింద రావు బెదిరింపులకు లొంగేది లేదని ఆయన అన్నారు.

పోలీసులు బలగాలు తెలంగాణ ఉద్యమాన్ని ఆపలేవని తెలంగాణ జెఎసి చైర్మన్ ప్రొఫెసర్ కోదండ రామ్ అన్నారు. శ్రీకృష్ణ కమిటీ నివేదిక వచ్చిన తర్వాత ఉద్యమం తీవ్ర స్థాయిలో ఉంటుందని ఆయన హెచ్చరించారు. శ్రీకృష్ణ కమిటీ నివేదిక తెలంగాణకు అనుకూలంగా రాకపోతే తీవ్రంగా ఉంటుందని ఆయన అన్నారు. తెలంగాణలో ఎక్కడా హింసాత్మక సంఘటనలు జరగలేదని రాజేందర్ అన్నారు. తమ సహనాన్ని పరీక్షించవద్దని ఆయన హెచ్చరించారు. డిజిపి రాజకీయ నాయకుడిలా మాట్లాడుతున్నారని తెలంగాణవాదులు విమర్శిస్తున్నారు.