చంద్రబాబు అరెస్టులో రాజకీయాలు లేవు: డిఎల్ రవీంద్రా రెడ్డి

హైదరాబాద్‌: ప్రతిపక్ష నాయకుడు నారా చంద్రబాబునాయుడి అరెస్టులో ఏ విధమైన రాజకీయాలు లేవని రాష్ట్ర మంత్రి డిఎల్ రవీంద్రారెడ్డి చెప్పారు. ఏదైనా సమస్య వచ్చినప్పుడు పార్టీలు రాజకీయ లబ్ధి పొందడానికి ప్రయత్నించడం పరిపాటి అని, అయితే చంద్రబాబు తన ఆరోగ్యాన్ని కూడా చూసుకుని ప్రజల కోసం పోరాడాల్సిన అవసరం ఉందని ఆయన అన్నారు. ఆరోగ్య పరిస్థితి ఆందోళనకరంగా ఉండడం వల్లనే చంద్రబాబును అరెస్టు చేసి నిమ్స్ చేర్చినట్లు ఆయన సోమవారం మీడియా ప్రతినిధుల సమావేశంలో చెప్పారు. చంద్రబాబు వెంటనే దీక్ష విరమించి, వైద్యులకు సహకరించాలని ఆయన కోరారు. చంద్రబాబు దీక్షను తాము కాదనడం లేదని, రైతులకు జరిగిన నష్టాన్ని పూడ్చాలంటే సాధ్యం కాదని ఆయన అన్నారు.

దేశంలో ఏ రాష్ట్రంలో కూడా ఇవ్వని విధంగా తాము రైతులకు ప్యాకేజీ ఇచ్చామని ఆయన చెప్పారు. చంద్రబాబు బ్లడ్ షుగర్ తగ్గి హార్ట్ బీట్ లో తేడాలు వచ్చాయని, ఇది అత్యంత ప్రమాదకరమని, అందుకే అరెస్టు చేయాల్సి వచ్చిందని ఆయన చెప్పారు. ముఖ్యమంత్రి కిరణ్ కుమార్ రెడ్డి చంద్రబాబుతో ఫోన్ లో మాట్లాడడానికి ప్రయత్నించారని, కానీ చంద్రబాబు మాట్లాడే స్థితిలో లేరని డాక్టర్ సోమరాజు చెప్పారని ఆయన అన్నారు. అవిశ్వాస తీర్మానం పెడితే కేంద్ర, రాష్ట్ర ప్రభుత్వాలు రైతుల కోసం ఏం చేసిందో వివరించడానికి తమకు మంచి అవకాశం లభిస్తుందని ఆయన చెప్పారు. రైతుల కోసం తాము చేయాల్సింది చాలా ఉందని, ముందు చంద్రబాబు ఆరోగ్యం ముఖ్యమని, చంద్రబాబు ఆరోగ్యాన్ని కాపాడాల్సిన బాధ్యత తనపై ఉందని ఆయన చెప్పారు.