వైయస్ జగన్ దీక్షపై ప్రభుత్వం కుట్ర చేస్తోంది: భూమన కరుణాకర్ రెడ్డి

విజయవాడ: వైయస్ జగన్ లక్ష్యదీక్షను అడ్డుకోవడానికి ప్రభుత్వం కుట్ర చేస్తోందని టిటిడి మాజీ చైర్మన్ భూమన కరుణాకర్ రెడ్డి ఆరోపించారు. అధికారాన్ని అడ్డుపెట్టి వైయస్ జగన్ పై అభిమానాన్ని ఆపలేరని ఆయన దీక్షా ప్రాంగణం వేదిక నుంచి ప్రభుత్వాన్ని హెచ్చరించారు. వైయస్ జగన్ దీక్షపై ప్రభుత్వం కక్ష కట్టిందని ఆయన ఆరోపించారు. వైయస్ దీక్షను దెబ్బ తీయడానికి నీచమైన ఎత్తుగడలకు పూనుకుందని ఆయన అన్నారు.

ఎన్ని కుట్రలు చేసినా వైయస్ జగన్ ప్రాభవాన్ని ఆపలేరని ఆయన అన్నారు. వైయస్ జగన్ దీక్షకు వస్తున్న అభిమానులను పోలీసులు అడ్డుకున్నారని ఆయన ఆరోపించారు. పర్వతం వంగి ఎవరికీ సలాం చేయదని, సముద్రం ఎవరి పాదాలనూ తాకదని, వైయస్ జగన్ ఎవరికీ లొంగి ఉండబోరని ఆయన అన్నారు. విజయవాడకు వస్తున్న వాహనాలను పోలీసులు, ఆర్టీఎ అధికారులు అడ్డుకుంటున్నారని సాక్షి చానెల్ ఆరోపిస్తోంది.