వారు రాజీనామా చేస్తే మేం సిద్ధం: కొండా సురేఖ, పిల్లి సవాల్

విజయవాడ: మాజీ పార్లమెంటు సభ్యుడు దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్ రెడ్డికి ముఖ్యమంత్రి కిరణ్ కుమార్ రెడ్డి ప్రభుత్వాన్ని కూల్చే ఆలోచన లేదని జగన్ వర్గం శాసనసభ్యురాలు కొండా సురేఖ బుధవారం లక్ష్యదీక్ష ప్రాంగణంలో విలేకరులతో అన్నారు. వైయస్ తన ఒంటిచేత్తో అధికారంలోకి తీసుకు వచ్చిన ప్రభుత్వాన్ని కూల్చాలనే ఉద్దేశ్యం లేదన్నారు. మా రాజీనామా కోరుతున్న వాళ్లు మొదట రాజీనామా చేసి వైయస్ బొమ్మ లేకుండా మళ్లీ ఎన్నికలకు సిద్ధం కావాలని, అప్పుడు మేం కూడా రాజీనామా చేస్తామని ఆమె సవాల్ చేశారు.

జగన్ చేపట్టిన లక్ష్యదీక్షలో ఎలాంటి రాజకీయం లేదన్నారు. ఆయన రైతుల సమస్యల పరిష్కారం కోసమే దీక్ష చేపట్టారన్నారు. మంత్రి శంకరరావుకు రైతుల సమస్యలు తెలియవని మాజీ మంత్రి పిల్లి సుభాష్ చంద్రబోసు అన్నారు. కాంగ్రెస్ అధిష్టానం తనను రాజీనామా చేయమని అడిగితే రాజీనామా చేయడానికి సిద్ధంగా ఉన్నానని తెలిపారు. రైతుల సమస్యలను రాజకీయం చేయాల్సిన అవసరం జగన్ కు లేదన్నారు.