జగన్ నిరాహార దీక్షలో నిజాయితీ: జనతా పార్టీ అధ్యక్షుడు సుబ్రహ్మణ్యస్వామి

చెన్నై: మాజీ పార్లమెంటు సభ్యుడు, దివంగత ముఖ్యమంత్రి వైఎస్ రాజశేఖరరెడ్డి తనయుడు వైఎస్ జగన్ చేస్తున్న నిరాహార దీక్షలో నిజాయితీ ఉందని జనతా పార్టీ అధ్యక్షుడు సుబ్రహ్మణ్యస్వామి బుధవారం అన్నారు. రైతాంగ సమస్యల పరిష్కారానికి జగన్ చేపట్టిన నిరాహార దీక్షలో రాజకీయ లబ్ధి లేదన్నారు. జగన్ దీక్షకు తన పూర్తి మద్దతు ఉంటుందని ప్రకటించారు.

కాగా అఖిల భారత కాంగ్రెస్ కమిటీ ప్రధాన కార్యదర్శి, యువనేత రాహుల్ గాంధీ దేశద్రోహి అని వ్యాఖ్యానించారు. 2జి స్పెక్ట్రం అవినీతి కుంభకోణంలో ఏఐసిసి అధ్యక్షురాలు సోనియాగాంధీ చేయి కూడా ఉందన్నారు. స్పెక్ట్రం కుంభకోణంలో సోనియాకు 60 శాతం నిధులు ముట్టాయని ఆరోపించారు. స్పెక్ట్రం కుంభకోణం విషయంలో కేంద్ర ప్రభుత్వం జెపిసి వేయకుండా తప్పించుకునే ప్రయత్నాలు చేస్తుందన్నారు. కేంద్ర ప్రభుత్వం వెంటనే జెపిసిని వేయాలని ఆయన డిమాండ్ చేశారు.